గ్లోబల్ స్టార్ ప్రియాంక చోప్రా తన భర్త నిక్ జోనాస్ను ఏడిపించిందంట. అదేంటి గత ఏడాదే కదా వీరికి పెళ్లైంది అప్పుడే గొడవలవుతున్నాయా? అని అనుకోకండి. ప్రియాంక నటించిన ద స్కై ఈజ్ పింక్ సినిమాలోని సన్నివేశం చూసి నిక్ భావోద్వేగానికి లోనయ్యాడట. ఈ విషయం ఆమె స్వయంగా చెప్పింది.
టొరంటో అంతర్జాతీయ చలనిచిత్రోత్సవాలకు భర్తతో కలిసి హాజరైన ప్రియాంక ఈ విషయాన్ని పంచుకుంది. ఆమె కొత్త చిత్రం ద స్కై ఈజ్ పింక్ షూటింగ్కు వచ్చిన నిక్.. ప్రియాంక నటనకు ముగ్ధుడై భావోద్వేగం చెందాడని తెలిపింది. తమ వివాహం నాలుగు రోజుల్లో ఉందనగా ఈ సంఘటన జరిగిందని చెప్పింది.
"ఆ విషయం ఇప్పుడు చాలా ఫన్నీగా ఉంది. అప్పటికి వివాహానికి నాలుగురోజులే ఉంది. షూటింగ్కు వస్తానని తను(నిక్) నాతో అన్నాడు. నేను ముందే సెట్స్కు వెళ్లాను. సినిమాలో కీలక సన్నివేశాన్ని తెరకెక్కిస్తున్నారు. నేను లీనమై నటిస్తున్నా. అప్పటికే వచ్చిన నిక్ ఆ సీన్ చూసి కంట తడిపెట్టుకున్నాడు. అనంతరం దర్శకురాలు షోనాలి నా దగ్గరకు వచ్చి.. నీ భర్తనే నువ్వు ఏడిపించావ్.. సినిమాలో ఇది గొప్ప సన్నివేశంగా మిగిలిపోతుంది అని చెప్పింది" -ప్రియాంక చోప్రా, బాలీవుడ్ నటి
ఫర్హాన్ అక్తర్, జైరా వసీమ్, ప్రియాంక చోప్రా నటిస్తున్న ద స్కై ఈజ్ పింక్ చిత్రం అక్టోబరు 11న విడుదల కానుంది. షోనాలి బోస్ తెరకెక్కించిన ఈ చిత్రాన్ని సిద్ధార్థ్ రాయ్ కపూర్, ప్రియాంక చోప్రా తదితరులు నిర్మిస్తున్నారు.
ఇది చదవండి: వర్మ ఎన్నిసార్లు జైలుకు వెళ్లాడో తెలుసా ..?
