ఉత్తమ చిత్రంగా ఆస్కార్ అవార్డు అందుకున్న 'పారాసైట్'.. ప్రస్తుతం బ్రిటీష్ బాక్సాఫీస్ వద్ద కాసులవర్షాన్ని కురిపిస్తోంది. యూకేలో అత్యధిక వసూళ్లు సాధించిన విదేశీ భాషా చిత్రంగా ఘనత సాధించింది.
'బాంగ్ జూన్ హో' దర్శకత్వంలో తెరకెక్కిన ఈ కొరియన్ చిత్రం.. 2019 మే 31న ఆ దేశంలో విడుదలైంది. విశేషాదరణ పొందిన తర్వాత ప్రపంచవ్యాప్తంగా రిలీజ్ చేయాలని చిత్రబృందం నిర్ణయించింది. ఫిబ్రవరి 7న బ్రిటన్ ప్రేక్షకుల ముందుకొచ్చింది. అప్పట్నుంచి ఇప్పటివరకు దాదాపు వంద కోట్లకు పైచిలుకు కలెక్షన్లు సాధించింది. ఫలితంగా వసూళ్లలో సరికొత్త రికార్డులను సృష్టించిందని ఆ సినిమా డిస్ట్రిబ్యూటర్లు ట్విట్టర్లో వెల్లడించారు.
'పారాసైట్' సినిమాకు ఆస్కార్ చిత్రోత్సవంలో అవార్డుల పంట పండింది. ఉత్తమ చిత్రం, ఉత్తమ దర్శకుడితో సహా నాలుగు పురస్కారాలు అందుకుంది. ఈ అవార్డు అందుకున్న రెండో విదేశీ దర్శకుడిగా ఘనత సాధించాడు 'బాంగ్ జూన్ హో'. ఈ సినిమా ప్రపంచవ్యాప్తంగా 19 వందల కోట్ల రూపాయల కలెక్షన్లు కొల్లగొట్టింది.
కథేంటంటే...
ఓ పేద కుటుంబంలోని నలుగురు వ్యక్తులు.. కడుపు నింపుకోవడమే గగనంగా ఉన్న పరిస్థితుల్లో.. ఉద్యోగాల కోసం ఓ ధనిక కుటుంబం పంచన చేరుతారు. తామంతా ఒకే కుటుంబం అన్న విషయాన్ని యజమానుల దగ్గర దాచిపెడతారు. వాళ్ల కన్నా ముందు ఆ ఉద్యోగాలు చేస్తున్న వారిని మోసపూరితంగా ఆ ఇంటి నుంచి వెళ్లగొడతారు. యజమాని కుటుంబం విహార యాత్రకు వెళ్లినప్పుడు ఆ ఇంటిలోని సౌకర్యాలను అనుభవిస్తూ దర్జాగా గడిపేస్తుంటారు. అయితే తమ వల్ల ఉద్యోగాలు కోల్పోయినవారికి వీరంతా ఒకే కుటుంబం అన్న విషయం తెలిసిపోతుంది.
ఆలోపు యజమాని కుటుంబం తిరిగి వచ్చేస్తోందన్న సమాచారం వస్తుంది. ఆ తర్వాత ఏం జరిగింది? తమ బండారం బయటపడితే ఉద్యోగాలు పోతాయన్న భయంతో వాళ్లేం చేశారు? అనే విషయాలతో పారాసైట్ చిత్రం తెరకెక్కింది. పేద, ధనిక వర్గాల అంతరాల వల్ల సమాజంలో నెలకొన్న కఠిన పరిస్థితులకు.. వినోదాన్ని జోడించి దర్శకుడు అద్భుతంగా చిత్రాన్ని తెరకెక్కించాడు. ప్రస్తుతం ఈ చిత్రాన్ని టెలివిజన్ సిరీస్ రూపంలో ప్రసారం చేయనున్నట్లు తెలుస్తోంది.
ఇదీ చూడండి.. మణిరత్నం మ్యాజిక్: 25 వసంతాల బొంబాయి లవ్స్టోరీ
