ప్రమోషన్ కార్యక్రమాల్లో నటి త్రిష పాల్గొనకపోతే ఆమె తీసుకున్న రెమ్యూనరేషన్‌లో కొంత భాగం నిర్మాతకు తిరిగి చెల్లించాల్సి ఉంటుందని నిర్మాత టి.శివ హెచ్చరించారు. 24 హౌస్‌ ప్రొడక్షన్స్‌ బ్యానర్పై తిరుజ్ఞానం దర్శకత్వంలో తెరకెక్కిన చిత్రం 'పరమపద విళైయాట్టు'. ఇందులో త్రిష ప్రధాన పాత్ర పోషించింది. ఆమెకు ఇది 60వ చిత్రం కావడం విశేషం. అమ్రీష్‌ సంగీతం సమకూర్చాడు. ఈ నెల 28న ఈ సినిమా విడుదల కానుంది.
తాజాగా ఈ చిత్రం ప్రీ రిలీజ్‌ కార్యక్రమం చెన్నైలోని సత్యం థియేటర్‌లో జరిగింది. అయితే ఈ కార్యక్రమానికి నటి త్రిష హాజరు కాలేదు. త్రిష ప్రధాన పాత్రలో తెరకెక్కిన ఈ చిత్రంలో స్వయాన ఆమే పాల్గొనకపోవడం వల్ల చిత్రబృందం ఆవేదనకు గురైంది.
ఈ నేపథ్యంలో నిర్మాత శివ మాట్లాడుతూ "ఈ సినిమాను నేనింకా చూడలేదు. కానీ చిత్రాన్ని చూసిన నా మిత్రులు చాలా బాగుందని చెప్పారు. హీరో లేకుండా అద్భుతంగా రూపొందించారు. త్రిష స్టార్‌ హోదాతో సినిమాను తెరకెక్కించారు. కానీ ఈ చిత్ర కార్యక్రమానికి ఆమె రాకపోవడం బాధాకరం. భవిష్యత్తులో ఆమె ఇలాంటి ప్రచార కార్యక్రమాలకు సహకరించకపోతే ఆమె తీసుకున్న రెమ్యూనరేషన్‌లో కొంత భాగం నిర్మాతకు తిరిగి ఇచ్చేలా నిర్మాతల మండలి తరఫున కోరుతాం" అని చెప్పాడు.
