చక్కని ఆహార్యాభినయంతో అభిమానుల మనసుల్లో చోటు సంపాదించుకున్న హీరోయిన్ నివేదా థామస్. ఇటీవలే 'వి' చిత్రంతో ఓటీటీ వేదికగా ప్రేక్షకులను పలకరించి మెప్పించింది. అయితే గ్లామర్ పాత్రల కోసం స్కిన్ షోకు ఎప్పటికీ సిద్ధపడనని అంటోంది ఈ భామ. ఓ మీడియాకు ఇచ్చిన ఇంటర్వ్యూలో.. గ్లామర్ పాత్రల పట్ల మీ ఆలోచనలు ఎలా ఉంటాయని అడగ్గా.. నివేదా పలు ఆసక్తికర విషయాలు పంచుకుంది.
"గ్లామర్ పాత్రలనే కాదు. ఏ పాత్ర ఎంపికలోనైనా నేను మొదట ఆలోచించేది ఒక్కటే. కథ వింటున్నప్పుడే కచ్చితంగా ఆ పాత్ర నేనే చేయాలి అనిపించాలి. తర్వాత అందులో కథ ప్రేక్షకుల్ని మెప్పిస్తుందా? లేదా? అని బేరీజు వేసుకుని రంగంలోకి దిగుతా. ప్రత్యేకంగా గ్లామర్ పాత్రలంటారా.. కావాలని స్కిన్ షోకు సిద్ధపడను. ఎందుకంటే కొన్నాళ్ల తర్వాత వెనక్కి తిరిగి చూసుకుంటే నేను ఫలానా సినిమాలో నటించా అని గర్వంగా చెప్పుకోవాలి. నటిగా నాకు పేరొస్తుందనిపిస్తే హారర్ కథల్లో నటించడానికైనా సిద్ధమే.'' అని చెప్పింది.
