ఈ ఏడాదిలో ఇప్పటికే రెండు చిత్రాలతో సందడి చేశారు హీరో నితిన్. ఇప్పుడు ముచ్చటగా మూడో చిత్రాన్ని ప్రేక్షకుల ముందుకు తీసుకొచ్చే పనిలో ఉన్నారు. ఆయన కథా నాయకుడిగా శ్రేష్ఠ్‌ మూవీస్‌ పతాకంపై ఓ చిత్రం తెరకెక్కుతోంది. మేర్లపాక గాంధీ దర్శకుడు. సుధాకర్‌రెడ్డి, నిఖితా రెడ్డి నిర్మాతలు. నితిన్‌కు జోడీగా నభా నటేష్‌ నటిస్తోంది. తమన్నా ఓ ముఖ్య పాత్రను పోషిస్తోంది. మంగళవారం నితిన్ పుట్టినరోజు. ఈ సందర్భంగా ఈ సినిమాకు 'మాస్ట్రో' అనే పేరును ఖరారు చేస్తున్నట్టు ప్రకటిస్తూ.. ఫస్ట్లుక్ను విడుదల చేశారు.
హిందీలో విజయవంతమైన 'అంధాధున్'కు రీమేక్‌గా రూపొందుతున్న చిత్రమిది. జూన్‌ 11న విడుదల చేయబోతున్నారు. ఇందులో నితిన్ అంధుడిగా కనిపించనున్నారు. ఫస్ట్ లుక్ ఆసక్తిని రేకెత్తించేలా ఉంది. "నితిన్ ఇదివరకెప్పుడూ చేయని ఓ విలక్షణ పాత్రను ఇందులో పోషిస్తున్నారు. పరిశ్రమ వర్గాలతోపాటు నితిన్ అభిమానులు ఈ చిత్రం కోసం ఆసక్తిగా ఎదురు చూస్తున్నారు. 'భీష్మ' చిత్రానికి స్వరాలు సమకూర్చిన మహతి స్వరసాగర్‌ ఈ చిత్రానికి సుమధురమైన బాణీలు అందిస్తున్నారు. ప్రేక్షకుల అంచనాలకు తగ్గట్టుగా చిత్రం అలరిస్తుంది" అని చిత్రబృందం తెలిపింది.
ఇదీ చూడండి: 'జయం'తో వచ్చి.. అభిమానుల 'ఇష్క్' గెలిచి!
