ప్రముఖ బాలీవుడ్ గాయకుడు మికాసింగ్కు గట్టి ఎదురుదెబ్బ తగిలింది. ఇటీవల పాక్ మాజీ ప్రధాని పర్వేజ్‌ ముషారఫ్‌ బంధువుల వివాహ కార్యక్రమానికి హాజరైన అతడు... ఓ సంగీత ప్రదర్శన ఇచ్చాడు. ఇందుకు సంబంధించిన ఫొటోలు సామాజిక మాధ్యమాల్లో వైరల్‌ అయ్యాయి. మికాపై నెటిజన్లు సహా దేశవ్యాప్తంగా తీవ్ర విమర్శలు వెల్లువెత్తాయి. తాజాగా ఆల్ ఇండియా సినీ వర్కర్స్ అసోసియేషన్ (ఏఐసీడబ్ల్యూఏ) అతడిపై వేటు వేస్తూ నిర్ణయం తీసుకుంది.
ఈ నిషేధం ఫలితంగా దేశంలోని అన్ని నిర్మాణ సంస్థలు, మ్యూజిక్ కంపెనీలు, ఆన్‌లైన్ మ్యూజిక్ ప్రొవైడర్స్ ఇక నుంచి మికా సింగ్తో పనిచేయకూడదని ఆదేశించింది ఏఐసీడబ్ల్యూఏ. ఒకవేళ తమ నిర్ణయానికి వ్యతిరేకంగా ఎవరైనా మికా సింగ్తో పనిచేస్తే.. వారిపై కఠిన చర్యలు తీసుకుంటామని హెచ్చరించింది.
కశ్మీర్ విషయంలో భారత నిర్ణయాన్ని పాకిస్థాన్ తప్పు పట్టడం వల్ల.. ఇరు దేశాల మధ్య ద్వైపాక్షిక సంబంధాలు దెబ్బతిన్నాయి. ఇలాంటి సమయంలో మికాసింగ్ దేశం కన్నా డబ్బుకే ప్రాధాన్యత ఇచ్చాడని.. అందుకే అతనిపై నిషేధం విధించామని ఏఐసీడబ్ల్యూఏ తెలిపింది. సమాచార ప్రసార మంత్రిత్వ శాఖ ఇందులో జోక్యం చేసుకోవాలని కోరింది.
ఇది చదవండి: సైరా మేకింగ్ వీడియో అదుర్స్!
