మెగాస్టార్ చిరంజీవి 'ఆచార్య'లో నటించాల్సిన త్రిష.. సృజనాత్మక వైరుధ్యాల వల్ల తప్పుకుంటున్నట్లు నిన్న ట్వీట్ చేసింది. అప్పటి నుంచి ఈమె స్థానాన్ని ఎవరు భర్తీ చేస్తారా? అని అభిమానులు తెగ చర్చించుకుంటున్నారు. వాటికి సమాధానం ఇప్పుడు దొరికినట్లే కనిపిస్తోంది.
మెగాస్టార్ రీఎంట్రీ చిత్రం 'ఖైదీ నం.150'లో నటించిన కాజల్ అగర్వాల్నే ఇందులోనూ కథానాయికగా ఎంపిక చేశారని సమాచారం. త్వరలో అధికారిక ప్రకటన రానుంది. ఈ సినిమాలో చిరు, దేవాలయ ఉద్యోగిగా కనిపించనున్నాడు. హీరోలు రామ్చరణ్, మహేశ్బాబులలో ఒకరు అతిథి పాత్రలో నటిస్తారని వార్తలు వస్తున్నాయి. వీటిపై స్పష్టత రావాల్సి ఉంది.
ప్రస్తుతం హైదరాబాద్లో షూటింగ్ జరుగుతోంది. మణిశర్మ సంగీతమందిస్తున్నాడు. కొరటాల శివ దర్శకుడు. మ్యాట్నీ ఎంటర్టైన్మెంట్స్, కొణిదెల ప్రొడక్షన్స్ సంయుక్తంగా నిర్మిస్తున్నాయి.
