ఎత్తైన కొండ... దానిపై తళతళలాడుతూ, సుదూరానికి కూడా కనిపించే 'హాలీవుడ్' అనే ఆంగ్ల అక్షరాలు కనిపిస్తాయి. కాలిఫోర్నియాలోని లాస్‌ఏంజెలిస్‌లో హాలీవుడ్ హిల్స్‌ ప్రాంతంలో శాంటా మోనికా కొండల్లో మౌంట్‌లీ అనే కొండపై కనిపించే దృశ్యమిది. దీన్ని చూసిన వారు ఎవరైనా ఔరా అనాల్సిందే! ప్రపంచవ్యాప్తంగా వీక్షకులను ఇది విపరీతంగా ఆకట్టుకుంటోంది.
ప్రజలకు అంకితం
అమెరికా అనగానే గుర్తొచ్చే ప్రస్ఫుటమైన చిహ్నాల్లో ఈ హాలీవుడ్ కొండ ఒకటి. దీన్ని 'హాలీవుడ్ సైన్'(సంతకం) అంటారు. 1923లో జులై 13న దీన్ని అధికారికంగా ప్రజలకు అంకితం చేశారు. మొదట్లో 'హాలీవుడ్ ల్యాండ్‌' అనే అక్షరాలు ఉండేవి. తర్వాత 1949లో మరమ్మతులు చేసినప్పుడు కేవలం హాలీవుడ్ అనే అక్షరాలనే ఉంచారు. ఈ సంతకంలోని ఒక్కో అక్షరం 44 అడుగుల ఎత్తు ఉండటం విశేషం. మొత్తం అన్ని అక్షరాలు కలిపి 352 అడుగుల పొడవుగా అమరి ఉంటాయి.
రియల్‌ఎస్టేట్‌ అభివృద్ధికి
'ఫాదర్‌ ఆఫ్‌ హాలీవుడ్'గా పేరు తెచ్చుకున్న హెచ్‌.జె.వైట్లీ అనే రియల్‌ ఎస్టేట్‌ డెవలపర్‌ ఆలోచన ఇది. 1923లో ఈ కొండ చుట్టుపక్కల రియల్‌ఎస్టేట్‌ పెరగడానికి ఒక అడ్వర్‌టైజ్‌మెంట్‌గా ఉండటానికి దీన్ని ఏర్పాటుచేశారు. అనంతరం దీనికి విపరీతంగా ప్రాచుర్యం పెరిగిపోయింది. దీంతో దీన్ని కాపాడడానికి ఓ ట్రస్ట్‌ కూడా ఏర్పాటు చేశారు.
తరవాత మరికొందరు కలిసి 4000 విద్యుత్‌ బల్బులతో వెలిగేలా ఈ అక్షరాలను అప్పట్లో 21,000 డాలర్ల వ్యయంతో తీర్చిదిద్దారు. అనంతరం క్రమక్రమంగా లాస్‌ఏంజెలిస్‌లో అమెరికా సినిమా రంగం విస్తరించడం వల్ల దీనికి ప్రపంచవ్యాప్తంగా గుర్తింపు లభించింది.
ఇది చూడండి : 400 పేద కుటుంబాలకు అండగా సోనూసూద్
