"ప్రేక్ష‌కుల‌కు వినోదం పంచ‌డ‌మే నా ప‌ని. ఆ అవ‌కాశం ఏ భాష నుంచి వ‌చ్చినా స్వీక‌రిస్తా. కానీ తెలుగు, త‌మిళ భాష‌లు నాకు రెండు క‌ళ్లులాంటివి. ఈ రెండు చోట్ల న‌టించ‌డాన్ని ఎంత‌గానో ఆస్వాదిస్తాను" అని అంటోంది హీరోయిన్ హన్సిక.
'దేశ‌ముదురు'తో ప్ర‌యాణం ప్రారంభించిన ఈ భామ... ఆ త‌ర్వాత త‌మిళంలో బిజీ అయిపోయింది. కానీ టాలీవుడ్ను మాత్రం మ‌రిచిపోలేదు. ఇక్కడ అవ‌కాశం వ‌చ్చిన ప్ర‌తిసారీ న‌టిస్తోంది. 'గౌత‌మ్ నందా' త‌ర్వాత హన్సిక న‌టించిన తెలుగు చిత్రం 'తెనాలి రామకృష్ణ బిఎ.బిఎల్'. ఈ సినిమా శుక్ర‌వారం ప్రేక్ష‌కుల ముందుకు వ‌స్తున్న సంద‌ర్భంగా హన్సిక.. బుధ‌వారం హైద‌రాబాద్‌లో విలేకర్లతో ముచ్చ‌టించింది.
- న్యాయ‌వాది పాత్ర‌లో న‌టించారు క‌దా, మీకు లాయ‌ర్ స్నేహితులు ఎవ‌రైనా ఉన్నారా?
ఒక‌రున్నారు. త‌ను మా సోద‌రుడికి స్నేహితుడు. అందువల్ల నాకూ సోద‌రుడే అన్న‌మాట. ఎప్పుడు ఫోన్ చేసినా కోర్టులో ఉన్నానంటుంటాడు. ఈ సినిమా చేస్తున్నప్పుడు త‌న ప్ర‌పంచం ఎలా ఉంటుందో ఊహించుకున్నా. నేనూ చిన్న‌ప్పుడు న్యాయ‌వాదిని అవ్వాల‌నే అనుకొనేదాన్ని. ఏ విష‌యంలోనైనా స‌రే నేను బాగా వాదిస్తుంటాన‌న్న‌మాట(న‌వ్వుతూ).
- ఈ సినిమాతో ఆ కోరిక కొంత‌వ‌ర‌కు నెర‌వేరింద‌న్న‌మాట?
నేనేమీ సీరియ‌స్ లాయ‌ర్‌ను కాదులెండి. న‌వ్వించే చోటా మోటా లాయ‌ర్‌ను. తెనాలి పాత్ర‌లో క‌నిపించే సందీప్‌కిష‌న్‌తో క‌లిసి చేసే సంద‌డి మంచి వినోదాన్ని పంచుతుంది.
- ఈ సినిమా ఒప్పుకోవ‌డానికి ప్ర‌ధాన‌మైన ఓ కార‌ణం?
క‌థే. హాస్య‌భ‌రితంగా సాగే క‌థ‌లంటే స్వ‌త‌హాగా నాకు ఇష్టం. ఈ హత్య ఎవ‌రు చేశారు? కార‌ణం ఏంటి? క‌థ త‌ర్వాత ఎలాంటి మ‌లుపు తిరుగుతుందో?.. ఇలా ఒక ప‌క్క సినిమా చూస్తూ మరో ప‌క్క బుర్ర‌కు ప‌నిపెట్టే చిత్రం కాదిది. హాయిగా స‌ర‌దాగా చూస్తున్నంత‌సేపూ న‌వ్విస్తుంది. దర్శకుడు నాగేశ్వ‌ర‌ర్‌రెడ్డి క‌థ చెప్ప‌డ‌మే గ‌మ్మ‌త్తుగా ఉంటుంది. ఆయ‌న మార్క్ సినిమా ఇది.
- తెలుగులో సినిమా సినిమాకు రెండేళ్లు విరామం వ‌స్తోంది. కార‌ణ‌మేంటి?
ఈ విషయం నేను గ‌మ‌నించ‌లేదు. మంచి అవ‌కాశం నాకు ముఖ్యం. మంచి క‌థ నా దగ్గరకు వస్తే అది ఏ భాష అనేది ప‌ట్టించుకోను. కొన్ని సంద‌ర్భాల్లో తెలుగులో అవ‌కాశాలు వ‌చ్చినా త‌మిళ సినిమాల‌తో బిజీగా ఉండ‌టం వల్ల చేయ‌లేక‌పోయాను. అంతే.. ప్ర‌త్యేకంగా విరామం తీసుకోలేదు.
- క‌థానాయిక‌గా మీది సుదీర్ఘ ప్ర‌యాణం.. యాభై సినిమాలు చేశారు. వెనక్కి తిరిగి చూసుకుంటే ఏమ‌నిపిస్తోంది?
ఇన్ని సినిమాలు చేయాల‌ని, చేస్తాన‌ని కాని ఊహించలేదు. ఒక ప్ర‌వాహంలా ప్ర‌యాణం సాగిపోతోందంతే. ఇంకా చాలా దూరం ప్రయాణించాలి.
- వ్య‌తిరేక ఛాయ‌ల‌తో కూడిన పాత్రలొస్తే చేయ‌డానికి సిద్ధ‌మేనా?
అస్సలు ఆలోచించ‌ను. మ‌ల‌యాళంలో మోహ‌న్‌లాల్‌తో క‌లిసి ఓ సినిమా చేశా. అందులో నాది వ్య‌తిరేక ఛాయలున్న పాత్రే. విల‌నిజంతో కూడిన పాత్ర‌లంటే నాకు చాలా ఇష్టం. అవ‌కాశం వ‌చ్చిందంటే త‌ప్ప‌కుండా చేస్తా.
- బ‌రువు బాగా త‌గ్గిన‌ట్టున్నారు. మ‌రింత నాజూగ్గా క‌నిపిస్తున్నారు?
ఐదేళ్లుగా ఫిట్‌నెస్ విష‌యంలో మ‌రింత శ్ర‌ద్ధ తీసుకుంటున్నా. నాజూగ్గా మార‌డం వెన‌క ర‌హస్యం స్క్వాష్ ఆడ‌ట‌మే. స‌మ‌యం దొరికితే ఈ గేమ్ ఆడుతుంటా. అది నా బ‌రువును బాగా నియంత్రిస్తుంటుంది.
- తెలుగులో కొత్త‌గా ఒప్పుకున్న సినిమాలేమైనా ఉన్నాయా?
'భాగమతి' ఫేమ్ జి.అశోక్ ద‌ర్శ‌క‌త్వంలో వెబ్సిరీస్ చేశా. అందులో నేటితరం యువ‌తుల్ని ప్ర‌తిబింబించే పాత్ర నాది. మరో నాలుగైదు రోజులు మాత్రమే చిత్రీక‌ర‌ణ జరగాలి. రాబోయే కాలమంతా వెబ్ సిరీస్‌లదే. నేనైతే బాగా చూస్తుంటా. త‌ప్ప‌కుండా ఈ వెబ్సిరీస్ అలరిస్తుంది.
- ఈమ‌ధ్య కొత్త కారు కొన్న‌ట్టున్నారు?
దంతేరస్ను పుర‌స్క‌రించుకొని మా అమ్మ.. మెర్సిడెస్ బెంజ్ ఎస్.క్లాస్ను బ‌హుమానంగా ఇచ్చింది. అదంటే చాలా ఇష్టం.
ఇది చదవండి: క్రికెటర్ శ్రీశాంత్తో హన్సిక ప్రేమాయణం..!
