బాలీవుడ్ ఎవర్గ్రీన్ క్లాసిక్ 'దిల్వాలే దుల్హానియా లేజాయేంగే'.. ఇటీవలే పాతిక వసంతాలను పూర్తి చేసుకుంది. ఈ సందర్భంగా 'డీడీఎల్జే'ను ప్రపంచ వ్యాప్తంగా మళ్లీ విడుదల చేయాలని నిర్ణయించారు సినిమా డిస్ట్రిబ్యూటర్లు. గురవారం ఈ విషయాన్ని అధికారికంగా ప్రకటించింది అంతర్జాతీయ డిస్ట్రిబ్యూటర్ల సంఘం.
" ప్రేక్షకులను డీడీఎల్జే సినిమా ఎప్పటికీ అలరిస్తూనే ఉంటుంది. ప్రపంచ వ్యాప్తంగా ఎప్పుడు థియేటర్లలోకి వచ్చినా అందరూ చూస్తూనే ఉన్నారు. పాతికేళ్లు పూర్తి చేసుకున్న సందర్భంగా అభిమానుల కోసం మరో సారి విడుదల చేయడం.. మాకు చాలా సంతోషంగా ఉంది. వెండితెరపై ఈ ప్రేమకథను అందరూ మళ్లీ చూసి ఆనందించవచ్చు. విదేశాల్లోని భారతీయుల ద్వారా ఈ చిత్రం మంచి వసూళ్లు సాధిస్తుంది."
-- నెల్సన్ డిసౌజా, అంతర్జాతీయ డిస్ట్రిబ్యూటర్ల సంఘం ఉపాధ్యక్షుడు
అమెరికా, జర్మనీ, సౌదీ అరేబియా, ఖతార్, కెనెడా, యూఏఈ, మారిషస్, దక్షిణాఫ్రికా, ఆస్ట్రేలియా, న్యూజిలాండ్, ఫిజి, నార్వే, స్పెయిన్, స్విట్జర్లాండ్, ఈస్టోనియా, ఫిన్లాండ్ దేశాల్లో డీడీఎల్జే మళ్లీ విడుదల కానుంది.
ఆదిత్యాచోప్రా దర్శకత్వంలో వచ్చిన 'డీడీఎల్జే'... అత్యధిక కాలం ప్రదర్శితమైన హిందీ సినిమాగా చరిత్ర సృష్టించింది.
ఇదీ చూడండి:డీడీఎల్జే@25: ప్రేమికులంటే గుర్తొచ్చేది షారుక్, కాజోల్!
