విశ్వవిఖ్యాత నట సార్వభౌమ ఎన్టీఆర్ జీవితాధారంగా తెరకెక్కిన చిత్రం 'ఎన్టీఆర్ కథానాయకుడు', 'మహానాయకుడు'. ఈ సినిమాలకు క్రిష్ దర్శకత్వం వహించాడు. ఇందులో నందమూరి నటసింహం బాలకృష్ణ.. ఎన్టీఆర్ పాత్రలో కనువిందు చేశాడు. ఈ చిత్రం బాక్సాఫీస్ వద్ద నిరాశపరిచింది. అందుకేనేమో మరోసారి ఎన్టీఆర్ పాత్రలో నటించాలని బాలయ్యకు ఆఫర్ వచ్చినా తిరస్కరించాడని సమాచారం.
దివంగత తమిళనాడు ముఖ్యమంత్రి జయలలిత జీవితాధారంగా, తమిళ దర్శకుడు ఏఎల్ విజయ్ 'తలైవి' అనే టైటిల్తో ఓ బయోపిక్ను తెరకెక్కిస్తున్నాడు. విష్ణు ఇందూరి, శైలేష్ ఆర్‌.సింగ్ నిర్మిస్తున్న ఈ చిత్రంలో ఎన్టీఆర్ పాత్ర కూడా ఉందట. ఆ పాత్రలో నటించడానికి బాలయ్యనే ఒప్పించాలని చిత్రబృందం భావించింది. ఎందుకంటే, ఎన్టీఆర్ బయోపిక్ నిర్మాతల్లో విష్ణు ఇందూరి కూడా ఒకరు. ఇప్పుడు అతడు నిర్మిస్తోన్న అమ్మ బయోపిక్లో ఎన్టీఆర్ పాత్ర ఉండటం, ఆ పాత్రలో బాలయ్య అయితేనే బాగుంటుందని అనుకుని అతడిని సంప్రదించడం జరిగాయట. కానీ బాలయ్య సున్నితంగా తిరస్కరించినట్లు తెలుస్తోంది.
ఫలితంగా చేసేదేమీ లేక ఎన్టీఆర్ పాత్రను సినిమాలో నుంచి తొలిగించినట్లు తెలుస్తోంది. మరి ఎన్టీఆర్ పాత్రను నిజంగానే తొలిగించారా లేక వేరే ఎవరి చేతైనా నటింపజేస్తున్నారా అనేది తెలియాలంటే అధికారిక ప్రకటన వచ్చే వరకు ఎదురుచూడక తప్పదు.
