యంగ్ రెబల్ స్టార్ ప్రభాస్ 'ఆదిపురుష్' చిత్రంతో నేరుగా బాలీవుడ్లో ఎంట్రీ ఇచ్చేందుకు సిద్ధమయ్యాడు. ఈ సినిమా అధికారిక ప్రకటన వచ్చినప్పటి నుంచి అభిమానుల్లో భారీ అంచనాలున్నాయి. ఈ చిత్రాన్ని భారత ఇతిహాస కథతో తెరకెక్కిస్తున్నట్లు ఇప్పటికే ప్రకటించింది చిత్రబృందం. దీంతో ఇంతటి భారీ ప్రాజెక్టుకు సంగీత దర్శకత్వం ఎవరు వహించబోతున్నారు? అంటూ చిత్ర పరిశ్రమలో ఆసక్తి నెలకొంది.
అయితే తాజాగా ఈ సినిమాకు సంగీతం అందించడానికి ఆస్కార్ విన్నర్ ఏఆర్ రెహ్మన్ను పరిశీలిస్తోందట చిత్రబృందం. అతడితో చర్చలు కూడా జరిపిందట. త్వరలోనే దీనిపై స్పష్టత రానుంది. ఒకవేళ ఇదే నిజమైతే ప్రభాస్ సినిమాకు రెహ్మన్ సంగీతం అందించిన మొదటి మూవీ ఇదే అవుతుంది.
ఈ సినిమాకు 'తానాజీ' ఫేమ్ ఓం రౌత్ దర్శకత్వం వహించబోతున్నాడు. ఇందులో ప్రభాస్ రాముడి పాత్రలో కనిపించనుండగా.. సైఫ్ అలీ ఖాన్ రావణుడి పాత్రలో కనువిందు చేయనున్నాడు. అలాగే సీత పాత్రకు ఎవరు ఎంపికయ్యారన్నది ఇంకా చిత్రబృందం వెల్లడించలేదు.
