హీరోయిన్ సోనాలీ బింద్రే అంటే తనకు చాలా ఇష్టమని ప్రముఖ వ్యాఖ్యాత ప్రదీప్ అన్నారు. ఆమె సినిమాల్లోని పాటలు టీవీలో వస్తే కళ్లు ఆర్పకుండా చూసేవాడ్నని ఈటీవీ భారత్కు ఇచ్చిన ప్రత్యేక ఇంటర్వ్యూలో వెల్లడించారు.
ఆయన హీరోగా పరిచయం కాబోతోన్న చిత్రం '30 రోజుల్లో ప్రేమించటం ఎలా?'. జనవరి 29న ప్రేక్షకుల ముందుకు రానుంది. ఈ సందర్భంగా సినిమా గురించి ప్రత్యేక విశేషాలు ప్రదీప్ మాటల్లోనే తెలుసుకుందాం.
బుల్లితెరపై ప్రేక్షకులను నవ్వించే ప్రదీప్.. ఈ సినిమాలోని ఎమోషనల్ సీన్స్లో ఎలా నటించారు?
'30 రోజుల్లో ప్రేమించటం ఎలా?' షూటింగ్ను ముందుగా సరదా సన్నివేశాలతో ప్రారంభించాం. ఆ తర్వాత ఎమోషనల్ సీన్స్ షూట్ చేశాం. ఆ సన్నివేశాలు చిత్రీకరించే రోజు పూర్తిగా ప్రిపేర్ అయ్యి సెట్కు వెళ్లేవాడ్ని. అయితే ఈ సినిమా ప్రారంభంలోని 10 నిమిషాలు కీలకం. దాన్ని చూడకపోతే కథ అర్థంకాదు.
ఈ సినిమా షూటింగ్లో గాయమైందట?
షూటింగ్లో చివరిరోజున అలా నడుస్తూ కిందపడ్డాను. అప్పుడు కాలికి గాయమైంది. అది పెద్దదై సర్జరీకి దారితీసింది. దాని తర్వాత మూడు నెలలు బ్రేక్ తీసుకున్నా. అంతా అయోమయంగా ఉన్నా ఆ సమయంలో. ఇప్పటికీ ఆ నొప్పి నుంచి కోలుకుంటున్నా. ఎక్కువసేపు నిల్చోవద్దని వైద్యులు చెప్పారు. అలా కాలునొప్పి అని సాకు చెప్పకుండా.. ప్రతిరోజు నా పనులు నేను చేసుకుంటున్నా.
తొలి దర్శకుడితో మీ అనుభవం ఎలా ఉంది?
దర్శకుడిగా మున్నా తనను తాను నిరూపించుకోవడం సహా నన్ను నేను నిరూపించుకునేందుకు ఇది సరైన అవకాశం అనిపించింది. అందుకే అతడిని నమ్మాను. నా కంటే దర్శకుడు చాలా కసితో ఈ సినిమా కోసం పనిచేశారు.
అమ్మ సెంటిమెంట్తో ఓ సన్నివేశం ఉందట?
అమ్మతో ప్రతి కొడుకు కనెక్ట్ అయ్యే సన్నివేశం అది. దాని తర్వాత చిత్రంలోని హీరోహీరోయిన్ల మధ్య అప్పటివరకు ఉన్న ఫీలింగ్స్ పూర్తిగా మారిపోతాయి. సినిమాకు అదే టర్నింగ్ పాయింట్.
ఇంతకు ముందు ఏమైనా సినిమాల్లో హీరోగా అవకాశాలు వచ్చాయా?
ఇంతకుముందు చాలా కథలు వచ్చాయి. అయితే అవి నాకు కనెక్ట్ కాలేదు. ఆ కథల్లో ప్రాణం లేకపోవడం లేదా హీరో అవ్వాలని నాకు ఆ సమయంలో అనిపించకపోవడం వంటి కారణాల వల్ల ఆ సినిమాలు చేయలేదు.
ప్రొమోషనల్ సాంగ్ గురించి?
ఫ్రెండ్స్ అందరూ కలిసి పాడుకునే పాట కావాలని అనూప్ రూబెన్స్ను అడిగాం. ముందు ఒక పేరా రాశాం. అలా ఒక పేరా నుంచి పాటగా మార్చాం. విశేషమేమిటంటే ఈ ప్రొమోషనల్ సాంగ్ చిత్రీకరణను సింగిల్షాట్లో పూర్తిచేశాం.
మీ ఫస్ట్లవ్ గురించి చెప్పగలరా?
మూడో తరగతిలో నా ఫస్ట్లవ్. అది తెలిసి తెలియని వయసు. ఏదో అలా జరిగిపోయింది. హీరోయిన్ సోనాలీ బింద్రే అంటే చాలా ఇష్టం. ఆమె సినిమాల్లోని పాటలు టీవీలో వస్తే కళ్లు ఆర్పకుండా చూసేవాడ్ని.
లాక్డౌన్లో సేవలు చేశారు కదా?
చాలా మంది సినీకార్మికులకు షూటింగ్ ఉంటేనే పూట గడుస్తుంది. లాక్డౌన్లో చాలామంది నిత్యావసర వస్తువులు లేక చాలా బాధపడ్డారు. అలా ఉన్న కొన్ని కుటుంబాలకు సాయం చేయగలిగాను. సోషల్మీడియాలో చాలామంది విద్యార్థులు బుక్స్ కావాలని అడిగితే వారి కోసం ఆన్లైన్లో ఆర్డర్ పెట్టి వాళ్ల అడ్రస్కు పంపిన సందర్భాలున్నాయి.
చిత్రపరిశ్రమలో ఏ దర్శకుడితో పనిచేయాలని ఉంది?
ఎప్పటికైనా ఇండస్ట్రీలో ఓ స్థాయికి ఎదగాలి. ఆ తర్వాత త్రివిక్రమ్, సుకుమార్ వంటి దర్శకులతో సినిమా చేయాలని ఉంది.
- " class="align-text-top noRightClick twitterSection" data="">
ఇదీ చూడండి: 'చిరంజీవి, రవితేజ నుంచి చాలా నేర్చుకున్నా'
