అత్యధిక పారితోషకం అందుకుంటున్న ఫోర్బ్స్-100 మంది సెలబ్రిటీల తాజా జాబితాలో బాలీవుడ్ నటుడు అక్షయ్ కుమార్ చోటు దక్కించుకున్నాడు. ఇందులోని ఏకైక భారతీయుడు ఇతడే కావడం విశేషం.
జూన్ 2019- మే 2020 మధ్య కాలంలో సంపాదించిన ఆదాయంను లెక్కించి, ఈ జాబితాను తయారు చేశారు. ప్రస్తుతం 52వ స్థానం సొంతం చేసుకున్న అక్షయ్, రూ.366 కోట్లు సంపాదించాడు. గతేడాదితో పోల్చితే 19 స్థానాలు దిగజారాడు. కరోనా ప్రభావమే ఈ హీరో ఆదాయం తగ్గడానికి ఓ కారణంగా కనిపిస్తోంది.
ఈ జాబితాలో అమెరికన్ మోడల్ కైలీ జెన్నర్(రూ.4,453 కోట్లు) తొలిస్థానంలో ఉంది. ఆ తర్వాత ర్యాపర్ కన్యా వెస్ట్, టెన్నిస్ ప్లేయర్ రోజర్ ఫెదరర్, ఫుట్బాల్ ఆటగాళ్లు క్రిస్టియానో రొనాల్డో, మెస్సీ తదితరులు ఉన్నారు.
అక్షయ్ కుమార్.. ఈ మధ్య కాలంలో 'కేసరి', 'మిషన్ మంగళ్', 'గుడ్న్యూస్', 'హౌస్ఫుల్ 4'లతో ప్రేక్షకుల ముందుకొచ్చాడు. 'లక్ష్మీబాంబ్', 'బచ్చన్పాండే', 'బెల్బాటమ్' తదితర చిత్రాల్లో నటిస్తూ బిజీగా ఉన్నాడు.
