Prabhas adipurush: 'బాహుబలి' తర్వాత ప్రభాస్ చిత్రాలకు ప్రేక్షకుల్లో విపరీతమైన క్రేజ్‌ వచ్చింది. దీంతో ఆయన సినిమాలను రిచ్గా తీర్చిదిద్దేందుకు దర్శక నిర్మాతలు ఆసక్తి కనబరుస్తున్నారు. అందుకోసం పెద్ద మొత్తంలోనే ఖర్చు పెడుతున్నారు. అలా భారీ బడ్జెట్‌తో తీస్తున్న ప్రభాస్ చిత్రాల్లో ఒకటి 'ఆదిపురుష్'. బాలీవుడ్ దర్శకుడు ఓం రౌత్ తెరకెక్కిస్తున్న ఈ చిత్రం ఇప్పటికే పూర్తయింది. తాజాగా ఈ చిత్రానికి సంబంధించి అదిరిపోయే అప్డేట్ ఇచ్చాడు రౌత్.
మంగళవారం ఉదయం 7 గంటల 11 నిమిషాలకు ఈ సినిమాకు సంబంధించి కీలక ప్రకటన చేయనున్నట్లు రౌత్ తెలిపాడు. అయితే దేని గురించి ప్రకటన చేస్తామనేది ఆయన చెప్పలేదు. దీంతో దేని గురించి అనౌన్స్మెంట్ చేస్తారా? అని ప్రభాస్ ఫ్యాన్స్ ఎంతో ఆసక్తిగా ఎదురుచూస్తున్నారు.
రామాయణ మహాకావ్యాన్ని ఆధారంగా చేసుకుని రూపొందుతున్న ఈ చిత్రంలో ప్రభాస్ రాముడి పాత్రలో నటించారు. టీ సిరీస్, రెట్రోఫైల్స్ ప్రైవేట్ లిమిటెడ్ సంయుక్తంగా నిర్మిస్తున్న ఈ చిత్రంలో బాలీవుడ్ నటి కృతిసనన్‌ సీత పాత్రలో కనిపించగా, నటుడు సైఫ్‌ అలీఖాన్‌ లంకేశుడిగా, బాలీవుడ్ నటుడు సన్నీ సింగ్ లక్ష్మణుడి పాత్రలో, మరాఠి నటుడు దేవ్దత్త నగే హనుమంతుడిగా కనువిందు చేయనున్నారు.
ఇదీ చూడండి: ఉక్రెయిన్ అధ్యక్షుడిపై సమంత ఆసక్తికర పోస్ట్
