లాక్​డౌన్​లో తెలుగు సినిమా.. హిట్టా ఫట్టా?

ఈ మధ్య కాలంలో ఓటీటీలో వచ్చిన తెలుగు సినిమాల్లో మీరేం చూశారు? అందులో ఏది నచ్చింది? ఒకవేళ ఏం చూడాలో తెలియడం లేదా? అయితే మీకోసమే ఈ స్టోరీ. ఇందులో ఏదైనా నచ్చితే ఆ సినిమా చూసేయండి.

కరోనా లాక్​డౌన్.. చాలా పరిశ్రమలపై పలు రకాలుగా తీవ్ర ప్రభావం చూపింది. టాలీవుడ్​ ఇందుకు అతీతమేమీ కాదు. మార్చి మూడో వారంలో మూసిన థియేటర్లను ఈ మధ్యే తెరిచారు. దీంతో వెండితెరపై విడుదల అవ్వాల్సిన చాలా చిత్రాలు.. ఓటీటీలను ఆశ్రయించాయి. పరిస్థితులు ఎప్పుడు సర్దుకుంటాయో తెలియక ఓవైపు, ఆర్థిక ఇబ్బందులు మరోవైపు ఉండటం వల్ల నిర్మాతలు ఓటీటీ మార్గాన్ని ఎంచుకుంటున్నారు. లాక్​డౌన్​ సమయంలో తెలుగులో చిన్న చిత్రాల నుంచి పలు పెద్ద సినిమాలు విడుదలై ప్రేక్షకాదరణ దక్కించుకున్నాయి. అందులో మీరు ఏమేం చూశారు? ఒకవేళ చూడకపోతే ఆ జాబితా ఇదిగో!

కృష్ణ అండ్ హిజ్ లీల

రొమాంటిక్​ ఎంటర్​టైనర్​గా తెరకెక్కిన ఈ చిత్రం.. జూన్ 25న నెట్​ఫ్లిక్స్​లో విడుదలైంది. మిశ్రమ స్పందన తెచ్చుకుని అందరినీ ఆకట్టుకుంటోంది. కృష్ణ, అతడి ముగ్గురు గర్ల్​ఫ్రెండ్స్​ మధ్య సాగే కథనమే ఈ సినిమా. సిద్ధు, సీరత్ కపూర్, శ్రద్ధా శ్రీనాథ్, షాలిని హీరోహీరోయిన్లు. రవికాంత్ దర్శకుడు.

భానుమతి & రామకృష్ణ

'ఆహా'లో వచ్చిన రొమాంటిక్ ఎంటర్​టైనర్​ ఈ సినిమా. జులై 3న ప్రేక్షకుల ముందుకొచ్చింది. 30ల్లో ఉన్న అబ్బాయి, అమ్మాయి మధ్య జరిగే ప్రేమకథతో దీనిని తెరకెక్కించారు. నవీన్ చంద్ర, సలోనీ లుథ్రా నటనతో మెప్పించారు. శ్రీకాంత్ నాగోతి దర్శకత్వం వహించారు.

భానుమతి & రామకృష్ణ సినిమాలోని ఓ సన్నివేశం

ఉమామహేశ్వర ఉగ్రరూపస్య

'మహిశంతే ప్రతీకారమ్'కు రీమేక్​ ఈ సినిమా. జులై 30 నెట్​ఫ్లిక్స్​లో విడుదలైంది. సత్యదేవ్ హీరోగా నటించగా, వెంకటేశ్ మహా దర్శకత్వం వహించారు. మహేశ్​ అనే కుర్రాడు అనుకోకుండా ఓ గొడవలో ఇరుక్కుని దెబ్బలు తగిలించుకుంటాడు. ఆ తర్వాత తన పగ ఎలా తీర్చుకున్నాడనేదే కథాంశం. ఓటీటీలో వచ్చిన తెలుగు సినిమాల్లో ప్రేక్షకుల పరంగా చూస్తే ఇదే తొలి హిట్!

ఉమామహేశ్వర ఉగ్రరూపస్య సినిమాలో సత్యదేవ్

వి

నాని, సుధీర్​బాబు, నివేదా థామస్, అదితీ రావు హైదరీ నటించిన యాక్షన్ థ్రిల్లర్​ 'వి'. సెప్టెంబరు 5న అమెజాన్ ప్రైమ్​లో విడుదలైంది. సైకో విలన్​కు, పోలీస్​ అధికారికి మధ్య జరిగే మైండ్​గేమ్​ నేపథ్యంతో ఈ సినిమా తీశారు. అయితే అంచనాల్ని అందుకోవడంలో ఈ చిత్రం విఫలమైందనే చెప్పాలి!

వి సినిమాలో నాని సుధీర్​బాబు

నిశ్శబ్దం

స్వీటీ అనుష్క నటించిన క్రైమ్ థ్రిల్లర్ 'నిశ్శబ్దం'. మాధవన్, అంజలి, అవసరాల శ్రీనివాస్ ప్రధాన పాత్రలు పోషించారు. అక్టోబరు 2న అమెజాన్ ప్రైమ్​లో విడుదలైంది. దివ్యాంగురాలి పాత్ర పోషించిన అనుష్క.. ఓ హత్యకు సాక్షి అవుతుంది. ఆ హత్యను పోలీసులు ఎలా ఛేదించారనేదే ఈ సినిమా. ఈ సినిమా కూడా నెటిజన్లను ఆకర్షించలేకపోయింది.

నిశ్శబ్దం సినిమాలో అనుష్క శెట్టి

ఒరేయ్ బుజ్జిగా

రొమాంటిక్ కామెడీ ఎంటర్​టైనర్​ అయిన ఈ సినిమా.. 'ఆహా'లో అక్టోబరు 2న విడుదలైంది. రాజ్​తరుణ్, మాళవిక, హెబ్బా పటేల్ హీరోహీరోయిన్లు. ఒకే ఊరికి చెందిన, అసలు పరిచయమే లేని అబ్బాయి, అమ్మాయి.. ఒకేసారి ఇంటి నుంచి వెళ్లిపోతారు. దీంతో ఆ ఊర్లో అందరూ వాళ్లిద్దరూ లేచిపోయారని భావిస్తారు. ఆ తర్వాత ఏం జరిగిందనేదే ఈ సినిమా. పూర్తి ఎంటర్​టైనర్​గా రూపొందిన ఈ చిత్రం ప్రేక్షకుల్ని బాగానే ఆకట్టుకుంది.

కలర్ ఫోటో

90ల్లో రంగు, కులం కారణంగా ఓ ప్రేమజంట ఎలాంటి ఇబ్బందులు ఎదుర్కొంది. అప్పుడు ఏం జరిగింది? లాంటి సున్నితమైన అంశాలతో రూపొందిన సినిమా 'కలర్ ఫోటో'. సుహాస్, చాందిని చౌదరి ప్రధాన పాత్రలు పోషించగా, సందీప్​ రాజ్ దర్శకత్వం వహించారు. 'ఆహా'లో అక్టోబరు 24న విడుదలైంది. ప్రేక్షకుల నుంచి విశేషాదరణ దక్కించుకుంది.

'కలర్​ ఫోటో' సినిమాలో ఓ సన్నివేశం

గతం

సైకలాజికల్ థ్రిల్లర్​గా తీసిన 'గతం'.. అమెజాన్ ప్రైమ్​లో నవంబరు 6న విడుదలైంది. రాకేశ్, పూజిత నటించగా, కిరణ్ రెడ్డి దర్శకుడు. గతం మర్చిపోయిన రిషి.. ఆస్పత్రిలో నిద్ర లేస్తాడు. తనకు అసలు ఏం జరిగింది? ఇక్కడ ఎందుకు ఉన్నానో తెలుసుకునేందుకు ప్రయత్నిస్తాడు. తర్వాత జరిగిన పరిణామాలేంటి? అనే కథాంశంతో తెరకెక్కిన ఈ చిత్రం థ్రిల్​కు గురి చేస్తుంది. దీనికి ప్రేక్షకుల నుంచి మంచి ఆదరణే లభించింది.

మిడిల్​ క్లాస్ మెలొడీస్

కామెడీ డ్రామాగా రూపొందిన ఈ చిత్రం.. చిన్న పిల్లల నుంచి పెద్దల వరకు అందరినీ అలరించింది. అమెజాన్ ప్రైమ్​లో నవంబరు 20న విడుదలై హిట్​గా నిలిచింది. ఆనంద్ దేవరకొండ, వర్ష బొల్లమ్మ కలిసి నటించగా, వినోద్ అనంతోజుకు దర్శకుడిగా ఇదే తొలి సినిమా. గుంటూరు నేపథ్యంగా దీనిని తెరకెక్కించారు.

మిడిల్​ క్లాస్ మెలొడీస్ సినిమాలోని సన్నివేశం

మిస్ ఇండియా

కీర్తి సురేశ్​ నటించిన లేడీ ఓరియెంటెడ్ సినిమా ఇది. నవంబరు 4న నెట్​ఫ్లిక్స్​లో విడుదలైంది. యువ మహిళా పారిశ్రామికవేత్త సంయుక్త.. 'చాయ్' బిజినెస్​లో ఎలాంటి ఆటుపోట్లు ఎదుర్కొని విజయం సాధించింది అనేదే చిత్రం. అయితే అనుకున్నంత స్థాయిలో ఆకట్టుకోలేక నిరాశపరిచింది.

మిస్ ఇండియా సినిమాలో కీర్తి సురేశ్

మా వింత గాధ వినుమా

ఈ రొమాంటిక్ ఎంటర్​టైనర్​లో సిద్ధు, సీరత్ కపూర్ జంటగా నటించారు. 'ఆహా'లో నవంబరు 13న విడుదలైంది. ఓ యువ ప్రేమ జంట వీడియో వైరల్​గా మారడం వల్ల వాళ్లు ఎలాంటి కష్టాలు ఎదుర్కొన్నారు? తర్వాత పరిణామాలు ఏంటి? అనేదే చిత్ర కథాంశం. ఈ చిత్రం పాజిటివ్​ రివ్యూస్ తెచ్చుకుంది.

ప్రస్తుతం థియేటర్లను తెరుచుకునేందుకు తెలుగు రాష్ట్ర ప్రభుత్వాలు అనుమతిచ్చిన నేపథ్యంలో 'సోలో బ్రతుకే సో బెటర్', 'క్రాక్', 'రెడ్' సినిమాలు విడుదలకు సిద్ధమవుతున్నాయి. మరికొన్ని చిత్రాలు ఓటీటీవైపు అడుగులేస్తున్నాయి.

ఇవీ చదవండి: