WhatsApp Multi Account Feature : మీ ఫోన్లో రెండు సిమ్కార్డులు ఉన్నాయా? కానీ ఆ రెండు నంబర్లతో ఒకేసారి వాట్సాప్ వాడలేకపోతున్నారా? ఇకపై ఆ సమస్య ఉండదు. వాట్సాప్ త్వరలోనే 'మల్టీ అకౌంట్ ఫీచర్'ను తీసుకురానుంది. ప్రస్తుతం ఒకే ఫోన్లో రెండు నెంబర్లతో వాట్సాప్ వాడాలంటే.. ఒకటి క్లోనింగ్ యాప్ అయినా వాడాలి. లేదంటే బిజినెస్ యాప్ అయినా ఉండాలి. ఇది యూజర్లకు కాస్త ఇబ్బంది కలిగించే అంశమే. అలా కాకుండా వేర్వేరు అకౌంట్లను ఒకే యాప్లో వాడుకునే వీలు ఉంటే, ఎంత బాగుంటుందో కదా! సరిగ్గా వాట్సాప్ కూడా ఇదే పని చేస్తోంది. ఒకే యాప్లో వేర్వేరు అకౌంట్లు (మల్టీ అకౌంట్స్) వాడుకునే సదుపాయాన్ని తీసుకురావడానికి సన్నాహాలు చేస్తోంది.
లేటెస్ట్ వెర్షన్లో..
Whatapp new update : వాట్సాప్ తాజాగా విడుదల చేసిన ఆండ్రాయిడ్ బీటా వెర్షన్ 2.23.13.5లో ఈ 'మల్టీ అకౌంట్' ఫీచర్ కనిపించింది. వాస్తవానికి వాట్సాప్కు సంబంధించిన అప్డేట్స్ ఇచ్చే.. 'వాట్సాప్బీటా ఇన్ఫో' ఈ సరికొత్త ఫీచర్ను గుర్తించింది. ప్రస్తుతం అభివృద్ధి దశలో ఉన్న ఈ ఫీచర్.. త్వరలోనే అందుబాటులోకి వచ్చే అవకాశం ఉందని తెలిపింది. ప్రస్తుతానికి ఈ మల్టీ అకౌంట్ ఫీచర్ వాట్సాప్ బిజినెస్ యాప్లో కనిపించింది. కానీ త్వరలోనే రెగ్యులర్ వాట్సాప్ యాప్లో కూడా ఈ ఫీచర్ను తీసుకువచ్చే అవకాశం ఉందని వాట్సాప్ బీటా ఇన్ఫో వెల్లడించింది.
మల్టీ ఫీచర్ విషయానికి వస్తే.. ఓ వ్యక్తి కుటుంబ సభ్యుల కోసం ఒక వాట్సాప్ అకౌంట్, ఆఫీస్ అవసరాల కోసం మరో అకౌంట్ వాడుతున్నాడని అనుకుందాం. ప్రస్తుతానికి ఇలా రెండు వేర్వేరు అకౌంట్లు వాడాలంటే క్లోనింగ్ యాప్ తప్పనిసరి. త్వరలో వాట్సాప్ తీసుకురానున్న మల్టీ అకౌంట్ ఫీచర్ ద్వారా సింగిల్ క్లిక్తో అకౌంట్ల మధ్య స్విచ్ కావచ్చు. సింపుల్గా సెట్టింగ్స్లోకి వెళ్లి, అకౌంట్ మారిస్తే మీకు కావాల్సిన అకౌంట్తో వాట్సాప్ను వినియోగించుకోవచ్చు. కొసమెరుపు ఏమిటంటే.. వాట్సాప్బీటా ఇన్ఫో షేర్ చేసిన స్క్రీన్షాట్ను చూస్తే.. రెండు కంటే ఎక్కువ అకౌంట్లు వాడుకునే అవకాశం ఉన్నట్లు స్పష్టంగా తెలుస్తోందని టెక్ నిపుణులు చెబుతున్నారు.
వాట్సాప్ నయా ఫీచర్లు
WhatsApp latest features : ప్రపంచవ్యాప్తంగా ఎక్కువ మంది వినియోగిస్తున్న సామాజిక మాధ్యమాల్లో వాట్సాప్ ఒకటి. వాట్సాప్ తన వినియోగదారుల కోసం ఎప్పటికప్పుడు సరికొత్త ఫీచర్లను తీసుకువస్తూనే ఉంది. ఇప్పటికే వాట్సాప్ గ్రూప్స్, ఛానల్స్ తీసుకొచ్చింది. వాట్సాప్ ద్వారా హెచ్డీ క్వాలీటీ ఫోటోలను పంపించుకునేందుకు వీలుగా మరో ఫీచర్ తీసుకురావడానికి సన్నాహాలు చేస్తోంది. వీడియో కాల్లో స్క్రీన్ షేరింగ్ ఫీచర్ను కూడా తీసుకురానుంది. ఇప్పటికే వాట్సాప్ ఎడిట్ మెసేజ్ ఫీచర్ను తీసుకొచ్చింది.
