Tesla Malfunction: టెస్లా.. వాహన రంగంలో ఓ సంచలనం. అదిరే లుక్స్, సెల్ఫ్ డ్రైవింగ్ వంటి అధునాతన, అద్భుతమైన ఫీచర్లతో ఎలక్ట్రిక్ కార్లు, ఎస్యూవీలు తీసుకొచ్చి.. నెక్స్ట్ జనరేషన్ వెహికిల్గా గుర్తింపు పొందింది. అయితే.. ఇప్పుడీ సంస్థను కొన్ని సమస్యలు వెంటాడుతున్నాయి. సెల్ఫ్ డ్రైవింగ్ టెక్నాలజీలో లోపాలు సవాళ్లు విసురుతున్నాయి. కార్ల యజమానులు, ప్రయాణికులకు చుక్కలు చూపిస్తున్నాయి. అనేక మంది ప్రాణాలను రిస్క్లో పడేస్తున్నాయి.
సడెన్ బ్రేక్లతో ప్రయాణికులకు షాక్లు
సెల్ఫ్ డ్రైవింగ్.. టెస్లా కార్లలోని ప్రత్యేక ఫీచర్. ఇది ఉంటే మనం డ్రైవింగ్ చేయనవసరం లేదు. ప్రశాంతంగా కూర్చుంటే.. కెమెరాలు, సెన్సార్లు, ఆర్టిఫీషియల్ ఇంటెలిజెన్స్, ప్రీలోడెడ్ మ్యాప్స్ సాయంతో కారే మనల్ని కావాల్సిన చోటుకు తీసుకెళ్తుంది. అయితే.. డ్రైవర్ ఎల్లప్పుడూ అప్రమత్తంగా ఉండాలని, అవసరమైనప్పుడు వాహనాన్ని నియంత్రించాలని చెబుతోంది టెస్లా.
ఈ సెల్ఫ్ డ్రైవింగ్ ఫీచర్ను అమెరికాలో ఎక్కువ మందే ఉపయోగిస్తున్నారు. అయితే.. ఇటీవల దీనిపై ఫిర్యాదులు ఎక్కువైపోయాయి. అమెరికా ప్రభుత్వ విభాగమైన జాతీయ రహదారి భద్రతా సంస్థ (ఎన్హెచ్టీఎస్ఏ)కు అనేక మంది టెస్లా యజమానులు ఆన్లైన్ ద్వారా కంప్లైంట్ చేస్తున్నారు. అందరి సమస్య ఒక్కటే ఫాంటమ్ బ్రేకింగ్.
ఫాంటమ్ బ్రేకింగ్ అంటే... అనవసరంగా కారు సడెన్ బ్రేక్ వేయడం. ఇది టెస్లా కార్లలో కొత్తేమీ కాదు. అంతకుముందు దాదాపు రెండేళ్లలో ఎన్హెచ్టీఎస్ఏకు ఇదే విషయంపై 34 ఫిర్యాదులు వచ్చాయి. కానీ.. గత 3 నెలల్లో లెక్క మారింది. ఏకంగా 107 కంప్లైంట్లు అందాయి. "ఆటో పైలట్ మోడ్లో ఉండగా కారు అకస్మాత్తుగా బ్రేక్ వేస్తోంది. ఒక్కోసారి హైస్పీడ్ హైవేలపై ఇలా జరుగుతోంది. వెనుక నుంచి ఏదైనా కారు ఢీకొడుతుందేమోనన్న భయంతో నా పాదాన్ని యాక్సలరేటర్పైనే ఉంచాల్సి వస్తోంది." అని ఓ వ్యక్తి ఎన్హెచ్టీఎస్ఏకు చేసిన ఫిర్యాదులో పేర్కొన్నాడు.
అవతలివైపు లైనులో వెళ్లే వాహనాలు హెడ్ లైట్లు, నీడల కారణంగా టెస్లా కార్లు ఇలా సడెన్ బ్రేక్లు వేస్తున్నట్లు ఆ ఫిర్యాదుల విశ్లేషణ ద్వారా తెలిసింది. అనేక అడుగుల దూరంలో ఒక ప్లాస్టిక్ సంచి కనిపించినా తన కారు బ్రేక్ వేసిందని ఓ వ్యక్తి వెల్లడించాడు.
టెస్లా కార్లలోని ఆటోమెటిక్ ఎమర్జెన్సీ బ్రేకింగ్ (ఏఈబీ) ఫీచర్లో లోపాలే ఈ సమస్యకు కారణంగా తెలుస్తోంది. ఏదైనా ప్రమాదం జరుగుతుందని అనుకుంటే.. కారు సడెన్ బ్రేక్ వేసేలా చేస్తుంది ఏఈబీ. ఇందుకోసం వాహనం చుట్టూ ఉండే సెన్సార్లపై ఆధారపడుతుంది. అయితే.. ఇటీవల రాడార్ సెన్సార్లు తీసేసి.. అనేక కెమెరాలు ఏర్పాటు చేసి ఆటో పైలట్ మోడ్ను మార్చింది టెస్లా. అప్పటినుంచే ఈ సడెన్ బ్రేక్ల సమస్య ఎక్కువైంది.
రెడ్ సిగ్నల్ పడినా డోంట్ కేర్..
ఖాళీగా ఉన్న రోడ్లపై సడెన్ బ్రేక్లు వేయడం ఓ లోపం అయితే.. ట్రాఫిక్ కూడళ్లలో రెడ్ సిగ్నల్ పడినా ఆగకపోవడం టెస్లా కార్లలోని మరో సమస్య. 'ఫుల్ సెల్ఫ్ డ్రైవింగ్' ఫీచర్ను పరీక్షిస్తున్న బీటా యూజర్లు ఈ సమస్యను గుర్తించారు. స్టాప్ సిగ్నల్ ఉన్నా, రెడ్ లైట్ పడినా.. టెస్లా కార్లు, ఎస్యూవీలు ఆగకుండా గంటకు 5.6 మైళ్ల వేగంతో ముందుకు వెళ్లిపోతున్నాయని తెలిసింది. దీనంతటికీ రోలింగ్ స్టాప్ ఫీచరే కారణం.
ఈ సమస్య వల్ల ఇప్పటివరకు ఎలాంటి ప్రమాదాలు జరగకపోయినా.. ఎన్హెచ్టీఎస్ఏ దీనిని తీవ్రంగా పరిగణించింది. టెస్లా ప్రతినిధులతో రెండుసార్లు విస్తృత చర్చలు జరిపింది. చివరకు 54వేల కార్లు, ఎస్యూవీలను వెనక్కు పిలిపించి, రోలింగ్ స్టాప్ ఫీచర్ను డిసేబుల్ చేసేందుకు టెస్లా అంగీకరించింది.
సెల్ఫ్ డ్రైవింగ్ టెక్నాలజీ విషయంలో టెస్లా అనేక విమర్శలు ఎదుర్కొంటోంది. ఆటో పైలట్ మోడ్లో ఉండగా జరిగిన 12 వేర్వేరు ప్రమాదాలపై అమెరికా జాతీయ రహదారి భద్రతా సంస్థ ఇప్పటికే దర్యాప్తు చేస్తోంది.
ఇదీ చూడండి : Indigenous Robot : పంద్రాగస్టు నాటికి స్వదేశీ రోబో రాబోతోంది..!
