Egg Fried Rice Recipe : మనలో చాలా మంది కర్రీ చేసే టైమ్ లేనప్పుడు త్వరగా అయిపోతుందని ఎగ్ ఫ్రైడ్ రైస్ చేసుకుంటుంటారు. అయితే, ఎప్పుడూ రెగ్యులర్గా చేసుకునేలా కాకుండా ఓసారి ఈ స్టైల్లో "ఎగ్ రైస్" చేసి చూడండి. టేస్ట్ అద్భుతంగా ఉండి పచ్చిమిర్చి, పుదీనా ఫ్లేవర్స్తో నోరూరిస్తుంది. ఇలా రోజూ చేసి పెట్టినా పిల్లల నుంచి పెద్దల వరకు లొట్టలేసుకుంటూ తింటారు. బిర్యానీ కంటే కూడా రుచికరంగా ఉంటుంది ఈ రైస్! ఎవరైనా దీన్ని సింపుల్గా చేసుకోవచ్చు. మరి, ఈ సూపర్ టేస్టీ రెసిపీకి కావాల్సిన పదార్థాలేంటి? ఎలా ప్రిపేర్ చేసుకోవాలి? అన్నది ఇప్పుడు చూద్దాం.
కావాల్సిన పదార్థాలు :
- బాస్మతి రైస్ - 1 కప్పు
- ఎగ్స్ - 4
- ఉల్లిపాయ - 1(మీడియం సైజ్ది)
- పుదీనా - కొద్దిగా
- కొత్తిమీర - కొద్దిగా
- పచ్చిమిర్చి - 5
- వెల్లుల్లి రెబ్బలు - 4
- అల్లం - అంగుళం ముక్క
- నూనె - 3 టేబుల్స్పూన్లు
- ఉప్పు - రుచికి సరిపడా
- మిరియాల పొడి - 1 టీస్పూన్
- ఆవాలు - అరటీస్పూన్
- జీలకర్ర - అరటీస్పూన్
- కరివేపాకు - 1 రెమ్మ
- పసుపు - అరటీస్పూన్
- గరంమసాలా - 1 టీస్పూన్
స్ట్రీట్ స్టైల్ "వెజ్ ఫ్రైడ్ రైస్" - పిల్లలు మళ్లీ కావాలంటారు!
తయారీ విధానం :
- ఇందుకోసం ముందుగా బాస్మతి రైస్ని శుభ్రంగా కడిగి కుక్కర్లోకి తీసుకోవాలి. ఆపై అందులో 2 కప్పుల వరకు వాటర్ పోసి 10 నుంచి 15 నిమిషాల పాటు నానబెట్టుకోవాలి.
- ఆ తర్వాత హై ఫ్లేమ్ మీద 3 విజిల్స్ వచ్చేంత వరకు ఉడికించుకోవాలి. అనంతరం ప్రెషర్ మొత్తం పోయాక మూత తీసి 1 టీస్పూన్ ఆయిల్ వేసుకొని కలిపి పక్కన పెట్టుకోవాలి. ఇలా చేయడం ద్వారా రైస్ చల్లారాక కూడా పొడిపొడిలాడుతూ ఉంటుంది.
- ఇప్పుడు మిక్సీ జార్ తీసుకొని పుదీనా, కొత్తిమీర, వెల్లుల్లి రెబ్బలు, సన్నగా కట్ చేసిన అల్లం ముక్కలు, పచ్చిమిర్చిని తుంపి వేసుకొని అన్నింటినీ ఒకసారి కలిపి పేస్ట్లా గ్రైండ్ చేసుకోవాలి.
- అనంతరం స్టౌపై పాన్ పెట్టుకొని 2 టేబుల్స్పూన్ల ఆయిల్ పోసుకోవాలి. నూనె కాస్త వేడయ్యాక ఎగ్స్ని పగులకొట్టి వేసుకోవాలి. అలాగే ఉప్పు, మిరియాల పొడి వేసుకొని పొరటులా లైట్గా వేయించుకొని పక్కకు తీసుకోవాలి.
- ఆ తర్వాత అదే పాన్లో అదనంగా మరో టేబుల్స్పూన్ ఆయిల్ని వేసుకొని వేడి చేసుకోవాలి. నూనె వేడయ్యాక జీలకర్ర, ఆవాలు వేసుకొని చిటపటమనే వరకు వేయించుకోవాలి.
- అవి వేగాక సన్నని ఉల్లిపాయ తరుగు వేసుకొని కాస్త మెత్తబడే వరకు వేయించాలి. అలా వేయించుకునేటప్పుడే కరివేపాకు వేసుకోవాలి.
- ఆనియన్స్ వేగాక పసుపు వేసి ఒకసారి కలుపుకోవాలి. ఆ తర్వాత మిక్సీ పట్టుకున్న పుదీనా పేస్ట్ని యాడ్ చేసుకొని లో-ఫ్లేమ్ మీద రెండు నిమిషాలపాటు వేగనివ్వాలి.
- అనంతరం వేయించి పక్కన పెట్టుకున్న గుడ్డు పొరటును వేసి మరో నిమిషంపాటు కలుపుతూ వేయించుకోవాలి. ఆ తర్వాత ముందుగా ఉడికించి పక్కన పెట్టుకున్న రైస్, గరంమసాలా, రుచికి తగినంత ఉప్పు, కొద్దిగా సన్నని కొత్తిమీర తరుగు వేసుకొని మొత్తం కలిసేలా ఒకసారి బాగా కలుపుకోవాలి.
- ఆపై మీడియం ఫ్లేమ్ మీద రైస్ బాగా వేడి అయ్యే వరకు కుక్ చేసుకొని దింపేసుకుంటే చాలు. అంతే, ఘుమఘుమలాడే "ఎగ్ రైస్" రెడీ!
ఇంట్లో కూరగాయలు లేవా ? - ఓసారి "లెమన్ పెప్పర్ రసం రైస్" చేయండి! - తృప్తిగా తినచ్చు!!
