ఐడెంటిటీ క్లోనింగ్.. నయా సైబర్ మోసం. ఇందుకోసం అచ్చుగుద్దినట్లు మీ తరహాలోనే ఫేక్ సోషల్మీడియా ప్రొఫైల్ తయారు చేస్తారు. దానితో మీ స్నేహితులు, బంధువులకు అత్యవసరంగా డబ్బులు కావాలని సందేశాలు పెడతారు. అదీ చాలా తక్కువ మొత్తంలో ఎక్కువ మందిని డిమాండ్ చేస్తారు. ఇటీవలె ఈ ఘటనకు బాధితుడయ్యారు లఖ్నవూ సెంట్రల్కు చెందిన ఏసీపీ అభయ్ కుమార్ మిశ్రా.
ఏం జరిగిందంటే..?
అభయ్ కుమార్ అకౌంట్ను పోలినట్లే నకిలీ ఫేస్బుక్ పేజీని తయారుచేశారు. ఇందుకోసం అతడి ఒరిజినల్ అకౌంట్ నుంచి ఫొటోలు, వ్యక్తిగత సమాచారం, ఫోన్ నంబర్ అన్నీ సేకరించి.. డూప్లికేట్ ఖాతా తయారుచేశారు. దాన్నుంచి తన స్నేహితులు, కాంటాక్ట్లకు డబ్బులు అత్యవసరమని సందేశాలు పంపించారు. అయితే రూ.5వేలు అత్యవసరమని అడిగినట్లు... మెసేజ్ రాగానే మిశ్రాను ఫోన్ చేసి అడిగాడు ఓ స్నేహితుడు. తను ఎలాంటి రిక్వెస్ట్ పెట్టలేదని నిర్ధరించుకున్నాక... నకిలీ ఖాతా ఉన్నట్లు ఆయన గుర్తించారు. వెంటనే లఖ్నవూ సైబర్క్రైమ్ పోలీస్స్టేషన్లో ఫిర్యాదు చేయగా.. కేసు నమోదు చేసుకొని విచారణ ప్రారంభించారు.
రోజుల వ్యవధిలోనే ఈ తరహా 12 కేసులు వచ్చినట్లు ఆ రాష్ట్ర సైబర్ సెల్ విభాగం తెలిపింది. అవగాహనతోనే ఇలాంటి వాటికి చెక్ పెట్టొచ్చని సలహా ఇచ్చారు పోలీసులు. ప్రొఫైల్ ఫొటోను లాక్ చేసుకోవడం, ఫ్రెండ్స్ జాబితాను పబ్లిక్కు కనపడకండా చేయడం వంటి జాగ్రత్తలు పాటించాలని యూజర్లకు సూచించారు.
ఇవీ చూడండి:
