ప్రైవేటు అంతరిక్ష దిగ్గజ సంస్థ స్పేస్ఎక్స్ ప్రయోగించిన స్టార్షిప్.. ల్యాండింగ్ చివరి క్షణంలో పేలిపోయింది. గాలిలో కొన్ని మైళ్ల పాటు ప్రయాణించిన ఈ అధునాతన నౌక.. ముందుగా నిర్ణయించిన ల్యాండింగ్ ప్రాంతానికే చేరుకుంది. అయితే ఆఖరి నిమిషంలో సమస్య తలెత్తి పేలింది. మొత్తం ప్రయోగం ఆరు నిమిషాల 42 సెకన్ల పాటు సాగింది.
ఈ అత్యాధునిక స్టార్షిప్ను 8 మైళ్లు (12.5 కిలోమీటర్లు) ఎత్తు వరకు పంపించి.. తిరిగి భూమిపై సురక్షితంగా నిలువుగా ల్యాండ్ చేయాలని లక్ష్యంగా పెట్టుకున్నారు. ఇంత ఎత్తు వరకు స్టార్షిప్ను పంపటం ఇదే తొలిసారి.
- " class="align-text-top noRightClick twitterSection" data="">
'సమాచారం సేకరించాం'
అయితే ఈ ప్రయోగం 'విజయవంతమైన ముందడుగు' అని అభివర్ణించారు స్పేస్ఎక్స్ సంస్థ సీఈఓ ఎలాన్ మస్క్. ఇంధన ట్యాంకుల్లో ఒత్తిడి తగ్గిందని, ల్యాండింగ్ కోసం ఇంజిన్లను మండించేసరికి స్టార్షిప్ వేగంగా కిందకు పడిపోయిందని చెప్పారు. అవసరమైన సమాచారం మొత్తం సేకరించినట్లు స్పష్టం చేశారు.
ఈ ప్రయోగం విజయవంతం కావడానికి మూడింట ఒకవంతు అవకాశాలు మాత్రమే ఉన్నాయని మస్క్ ఇదివరకే పేర్కొన్నారు. ఇప్పటికే ఈ ప్రయోగం ఓసారి వాయిదా పడింది. బుధవారం జరపాలని నిర్ణయించగా.. ప్రయోగానికి 1.3 సెకన్లు మిగిలి ఉండగా నిలిపివేశారు.
స్పేస్ఎక్స్ ఇప్పటికే 5 స్టార్షిప్ టెస్ట్ ఫ్లైట్లను ప్రయోగించింది. అవి చాలా సాధారణ మోడల్స్ కావటం వల్ల 490 అడుగులు (150 మీటర్ల) వరకే వెళ్లగలిగాయి. అయితే.. తాజాగా స్టార్షిప్ను స్టెయిన్లెస్ స్టీల్ వర్షన్లో మూడు రాప్టర్ ఇంజిన్లతో ప్రత్యేక ఆకృతిలో నిర్మించారు.
జెఫ్ బెజోస్ అభినందన
ప్రయోగం విషయంలో స్పేస్ఎక్స్కు ప్రైవేట్ ఏరోస్పేస్ కంపెనీ బ్లూ ఆరిజిన్ అధినేత జెఫ్ బెజోస్ అభినందనలు తెలిపారు.
అంతరిక్ష ప్రయాణాల కోసం తయారుచేసిన ఉత్తమమైన వ్యోమనౌకగా దీన్ని పరిగణిస్తున్నారు. వీటి ద్వారా అంగారక గ్రహం మీదకు మనుషులను పంపించాలని మస్క్ భావిస్తున్నారు. మరో ఆరేళ్లలో ఈ కళ సాకారమవుతుందని ఇదివరకే ఆశాభావం వ్యక్తం చేశారు.
