ఐఐటీ దిల్లీకి చెందిన సస్టైనబుల్ ఎన్విరానర్జీ రీసెర్చ్ ల్యాబ్ (ఎస్ఆర్ఈఎల్).. సరికొత్త ఆవిష్కరణ చేసింది. వాయు కాలుష్యాన్ని తగ్గించే వెనాడియం రెడాక్స్ ఫ్లో బ్యాటరీ (వీఆర్ఎఫ్బీ)ని తయారు చేసింది. ఈ బ్యాటరీ 20 ఏళ్ల వరకు మన్నికగా పని చేస్తుందని ఎస్ఆర్ఈఎల్ పరిశోధకులు అంటున్నారు.
ఈ బ్యాటరీ గ్రామీణ విద్యుదీకరణ, ఎలక్ట్రిక్ వాహనాల ఛార్జింగ్ స్టేషన్, దేశీయ వాణిజ్య పవర్ బ్యాకప్.. అవసరాల కోసం సమర్థంగా పునరుత్పాదక విద్యుత్ను నిల్వ చేసుకుని వినియోగించుకునేందుకు ఉపయోగపడుతుందని ఎస్ఈఆర్ఎల్ తెలిపింది. ఇది కార్బన్ రహిత పర్యావరణానికి బాటలు వేస్తుందని ధీమా వ్యక్తం చేసింది.
డీజిల్ బ్యాటరీకి సరైన ప్రత్యామ్నాయం..
దేశ రాజధాని దిల్లీలో రోజురోజుకు పెరుగుతున్న వాయు కాలుష్యాన్ని నియంత్రించేందుకు.. ఈ నెల 15 నుంచి డీజిల్ జనరేటర్ల వినియోగాన్ని నిషేధించింది (అత్యవసరాలకు తప్పా).. పర్యావరణ కాలుష్య అథారిటీ (ఈపీసీఏ). గ్రేడెడ్ రెస్పాన్స్ యాక్షన్ ప్లాన్లో భాగంగా ఈ నిర్ణయం తీసుకుంది. ఈ నేపథ్యంలో డీజిల్ జనరేటర్లకు.. వీఆర్ఎఫ్బీ సమర్థమైన ప్రత్యామ్నాయం కాగలదని అంటున్నారు.. ఐఐటీ దిల్లీ ఎస్ఈఆర్ఎల్, కెమికల్ ఇంజినీరింగ్ డిపార్ట్మెంట్ ప్రొఫెసర్ అనిల్ వర్మ. ఈ బ్యాటరీకి సంబంధించి పలు కీలక విషయాలను 'ఈటీవీ భారత్'తో పంచుకున్నారు.
"వీఆర్ఎఫ్బీ కాలుష్య రహితం (ఉద్గారాలు విడుదల చేయదు), ఇది సురక్షితం, పర్యావరణ హితం. ఎక్కువ రోజులు మన్నికగా ఉంటుంది. ప్లో బ్యాటరీ, సంప్రదాయ బ్యాటరీల మధ్య ప్రధాన తేడా ఏమిటంటే ఇండిపెండెంట్ పవర్ స్కేలింగ్ ఎనర్జీ సామర్థ్యం. ఫ్లో బ్యాటరీ కిలో వాట్ నుంచి మెగా వాట్ వరకు విద్యుత్ను నిల్వ చేసుకోగలదు. సంప్రదాయ బ్యాటరీతో పోలిస్తే తక్కువ ఖర్చులో ఎక్కువ సమయం బ్యాటరీ అవసరాలకు వీఆర్ఎఫ్బీ సరిగ్గా సరిపోతుంది."
-ప్రొఫెసర్ అనిల్ వర్మ, ఐఐటీ దిల్లీ ప్రొఫెసర్
మరో ఆరు నెలల్లో ఈ ప్రాజెక్టు పూర్తి స్థాయిలో సిద్ధమవుతుందని.. ఏడాది లోపు మార్కెట్లోకి వస్తుందని అనిల్ వర్మ తెలిపారు. ఈ ప్రాజెక్టుకు సంబంధించి ప్రొఫెసర్ అనిల్ వర్మ నేతృత్వంలోని ఎస్ఈఆర్ఎల్ బృందం ఐదు పేటెంట్లను కూడా ఫైల్ చేసింది.
ఇదీ చూడండి:భారత్ చేరిన మోదీ రెండో 'ప్రత్యేక' విమానం
