ఆన్లైన్లోని డిజిటల్ కంటెంట్కు చిన్నారులు, యువత బానిసలవ్వకుండా ఉండటానికి చైనా సరికొత్త నిర్ణయం తీసుకుంది. వ్యసనంగా మార్చేసే ఏ కంటెంట్పై అయినా ప్రభుత్వం లేదా తల్లిదండ్రులు చర్యలు తీసుకునేలా కొత్త నిబంధనలు అమలు చేయనుంది. వాటిని తన రాజ్యాంగంలోనూ చట్టాలుగా పొందుపర్చనుంది.
నిషేధమే..
మొబైల్, అంతర్జాలం, డేటా వినియోగం పెరిగాక చిన్నారులు ఎక్కువగా పబ్జీ వంటి ఆన్లైన్ గేమ్లు, కంటెంట్కు బానిసలు అవుతున్నారు. వాటిని నిషేధించినా, ఆడొద్దని హెచ్చరించినా ప్రాణాలు తీసుకుంటున్నారు. ఇలాంటి ఘటనలు పెరిగిపోతున్న నేపథ్యంలో చైనా తాజా నిర్ణయం తీసుకుంది. పిల్లలకు వ్యసనంగా మారే ఆన్లైన్ సేవలు, వస్తువులపై చైనా ప్రభుత్వం నిషేధం విధించనుంది. వీటితో పాటు చిన్నారులు, వారి తల్లిదండ్రులకు ప్రత్యేకమైన హక్కులు రానున్నాయి. వాటి సాయంతో ఆన్లైన్ వేధింపులపైనా చర్యలు తీసుకోవచ్చు. ఆన్లైన్లో ఏదైనా కంటెంట్పై అభ్యంతరం వ్యక్తం చేస్తే.. సర్వీస్ ప్రొవైడర్లు వాటిని బ్లాక్ చేయడం, తక్షణమే తొలగించడం చేయాల్సి ఉంటుంది.
జూన్ నుంచి అమలు..
సామాజిక మాధ్యమాలు, యాప్లు, లైవ్స్ట్రీమ్ సర్వీసులు, గేమ్ డెవలపర్లు ఇకపై తమ ఉత్పత్తులు, సర్వీసుల్లో సరికొత్త ఆప్షన్లు తీసుకురానున్నారు. యూజర్.. యాప్ లేదా సర్వీసు వాడేందుకు సమయాన్ని నిర్దేశించనున్నారు. అయితే ఇది పిల్లలకు మాత్రమే అమలు చేయనున్నారు. మీడియా కథనాల ప్రకారం.. వచ్చే ఏడాది జూన్ 1 నుంచి ఈ కొత్త చట్టం అమలులోకి రానుంది. దీని వల్ల గేమ్ డెవలపర్లు, లైవ్ స్ట్రీమ్ సర్వీసులు అందించేవారు.. తమ యూజర్లను కంటెంట్కు బానిసలు కాకుండా జాగ్రత్తలు పాటించనున్నారు.
పబ్జీలో అమలు..
ప్రస్తుతం పబ్జీ ఆన్లైన్ గేమ్ తయారీదారులు కొత్త నిబంధనలను అమలు చేస్తున్నారు. యూజర్ నిరంతరాయంగా రెండు గంటలు ఆడితే.. కాసేపు విరామం తీసుకోవాలని తక్షణమే హెచ్చరిక జారీ చేస్తుంది. అదే ఐదు గంటలకు మించి ఆడితే.. 24 గంటల పాటు యాప్ను వాడేందుకు వీలు లేకుండా యూజర్ను బ్లాక్ చేస్తుంది. ఈ నిర్ణయంతో గంటల కొద్దీ యాప్ వాడేందుకు వీలుండదు.
