Google Play Pass India: భారత్లో ఆండ్రాయిడ్ యూజర్ల కోసం మరో అప్డేట్ తీసుకొచ్చింది గూగుల్. ఎలాంటి యాడ్స్ లేకుండా 1000పైగా యాప్స్, గేమ్స్ యాక్సెస్ చేసుకోవచ్చని ప్రకటించింది. ఈ సౌకర్యం కోసం ప్లే స్టోర్లో ప్లే పాస్ విభాగాన్ని ప్రారంభించినట్లు తెలిపింది. నెలవారీ, వార్షిక ఛార్జీల సబ్‌స్క్రిప్షన్‌తో ఆయా యాప్స్, గేమ్స్ ప్రీమియం ఫీచర్లను యాక్సెస్ చేసుకోవచ్చని వెల్లడించింది. భారత్లో ప్లే పాస్ ఈ వారంలోనే అందుబాటులోకి రానున్నట్లు తెలిపింది.
నెలకు ఎంత?
"ప్లే పాస్.. 59 దేశాల్లోని డెవలపర్స్ నుంచి 41 కేటగిరీల్లో 1,000పైగా యాప్స్ను అందిస్తోంది. భారత్లోనూ ఇటువంటివి చాలానే ఉన్నాయి. అయితే వినియోగాదరులు నెలవారీ పాస్ కోసం రూ.99 చెల్లించాలి. రూ.889 చెల్లించి ఏడాది సభ్యత్వం పొందవచ్చు. ప్రీపెయిడ్ రూపంలో కావాలంటే.. ఒక నెలకు రూ.109తో సబ్‌స్క్రిప్షన్‌ చేసుకోవచ్చు. ఒక సబ్స్క్రిప్షన్ను ఐదుగురితో షేర్ చేసుకోవచ్చు" అని కంపెనీ ఓ ప్రకటనలో తెలిపింది.
ప్రకటనలు లేని యాప్స్, గేమ్స్ను ఎప్పటికప్పుడు ప్లేపాస్ ద్వారా తీసుకొచ్చేందుకు డెవలపర్లతో కలిసి పని చేస్తామని గూగుల్ పేర్కొంది. ఈ మేరకు కొత్త మార్గాల కోసం అన్వేషిస్తున్నట్లు గూగుల్ ఇండియా ప్లే పార్ట్‌నర్‌షిప్ డైరెక్టర్ ఆదిత్య స్వామి తెలిపారు. ప్రస్తుతం ప్లే పాస్ 90 దేశాల్లో అందుబాటులో ఉన్నట్లు తెలిపిన ఆదిత్య.. భారతీయ డెవలపర్‌లకు వారి గ్లోబల్ యూజర్ బేస్‌ను విస్తరించడానికి, రాబడిని పెంచుకోవడానికి ఇది దోహపడుతుందన్నారు.
ఇదీ చూడండి: ఈ తప్పులు చేస్తున్నారా?.. అయితే మీ వాట్సాప్ అకౌంట్ బ్లాక్!
