Vinayaka Chavithi Special Prasadalu Telugu: చవితి ఉత్సవాల్లో రకరకాల వినాయక విగ్రహాల తర్వాత.. అత్యంత ముఖ్యమైనవి ప్రసాదాలే. బొజ్జగణపయ్య గణపయ్య భోజనప్రియుడు అన్నసంగతి తెలిసిందే. అందుకే.. ఈ పండుగ వేళ.. ఆయనకు ఇష్టమైన ప్రసాదాలు తయారు చేసి.. ఆశీర్వాదాలు కోరుతుంటారు భక్తులు. మరి గణపతికి ఇష్టమైన ప్రసాదాలేంటో.. వాటిని ఎలా తయారు చేయాలో ఇక్కడ చూద్దాం.
పాల ఉండ్రాళ్లు:
How to Make Pala Undrallu in Telugu: బొజ్జ గణపయ్యకు అత్యంత ప్రీతికరమైన నైవేద్యం పాల ఉండ్రాళ్లు. అయితే వీటిని ఇంట్లో ఉన్న వాటితోనే చాలా సింపుల్గా చేసుకోవచ్చు. మరి ఈ ప్రసాదానికి కావాల్సిన పదార్థాలు, తయారీ విధానం ఏంటో తెలుసుకుందాం..
కావాల్సిన పదార్థాలు:
- బియ్యపు పిండి : కప్పున్నర
- పాలు : 2 1/2 కప్పులు
- చక్కెర : 100 గ్రా
- యాలకుల పొడి : చిటికెడు
- సాబుదానా(సగ్గుబియ్యం) : 3 టేబుల్ స్పూన్స్‌
- నూనె : పావు టీస్పూన్‌
తయారీ విధానం :
- ఒక గిన్నెలో తగినన్ని నీళ్లు(ఒక కప్పు బియ్యం పిండికి రెండు కప్పుల నీళ్లు), నూనె పోసి మరిగించాలి.
- ఆ నీళ్లలో బియ్యపు పిండి వేసి ఉండలు లేకుండా కలపాలి.
- కొద్దిగా నూనె చేతులకు రాసుకొని ఆ పిండిని చిన్న ఉండలుగా చేసి పెట్టుకోవాలి.
- ఇలా అన్నీ చేసి పెట్టాక ఇడ్లీ పాత్రలో కొన్ని నీళ్లు పోసి ఆవిరి మీద వీటిని ఉడికించాలి.
- ఈ లోపు గిన్నెలో పాలు పోసి మరిగించాలి.
- పాలల్లో సాబుదానా(ఓ పావుగంట నానబెట్టుకోవాలి), చక్కెర, యాలకుల పొడి వేసి సన్నని మంటమీద పది నిమిషాలు ఉడికించాలి.
- కొద్దిగా బియ్యం పిండి వేసి చిక్కగా అయ్యేలా చూడాలి.
- ఆ తర్వాత ఉడికించిన ఉండ్రాళ్లను వేసి సన్నని మంట మీద నాలుగు నిమిషాలు ఉంచి దించేయాలి.
చింతపండు పులిహోర:
Chintapandu Pulihora Making Process Telugu:
కావాల్సినవి :
- బియ్యం : ఒక కప్పు
- చింతపండు: కొద్దిగా
- పసుపు : ఒక టేబుల్ స్పూన్
- పల్లీలు : 3 టేబుల్ స్పూన్స్‌
- ఆవాలు : ఒక టీ స్పూన్
- శెనగపప్పు : ఒక టేబుల్ స్పూన్
- జీలకర్ర : ఒక టేబుల్ స్పూన్
- ఎండు మిరపకాయలు : 4
- నూనె, ఉప్పు : తగినంత
- పచ్చిమిర్చి-4
- మిరియాలు- ఒక టేబుల్ స్పూన్
- కరివేపాకు-తగినంత
తయారీ విధానం :
- చింతపండులో వేడి నీళ్లు పోసి నానబెట్టాలి. బియ్యాన్ని కడిగి కాసేపు నాననివ్వాలి.
- ఆ తర్వాత అన్నం మెత్తగా కాకుండా కొంచెం పొడిపొడిగా వండాలి.
- తర్వాత ఒక పెద్ద గిన్నె తీసుకొని అందులో చింతపండు రసం, కొన్ని నీళ్లు, నాలుగు పచ్చిమిర్చి, కొన్ని మిరియాలు, పసుపు, కొద్దిగా ఉప్పు, కొద్దిగా నూనె పోసి.. చిక్కగా అయ్యేవరకు ఉడికించాలి.
- ఈలోపు కడాయిలో నూనె పోసి ఆవాలు, శెనగపప్పును వేయించాలి. ఇందులోనే జీలకర్ర, పల్లీలు, ఎండుమిరపకాయలు, కరివేపాకు వేసి ఒక నిమిషం పాటు వేగనిచ్చి ఓ ప్లేట్లోకి తీసుకోవాలి.
- తర్వాత కొంచెం పెద్ద ప్లేట్(అంటే పులిహోర కలపడానికి వీలుగా ఉండేది) తీసుకుని అందులో ఉడికించిన అన్నం, కొద్దిగా నూనె, కొంచెం పసుపు వేసి ముందుగా కలుపుకోవాలి.
- ఆ తర్వాత అన్నంలో.. ఉడికించిన చింతపండు రసం.. ఉప్పు తగినంత వేసుకుని మరొకసారి కలుపుకోవాలి.
- తర్వాత కలిపిన అన్నంలో.. అంతకుముందు నూనెలో వేయించుకున్న పల్లీలు, జీలకర్ర, శెనగపప్పు, ఆవాలు, ఎండుమిరపకాయలు, కరివేపాకును వేసి బాగా కలపాలి.
- అంతే పులిహోర నైవేద్యం మీ ముందుంటుంది.
మోదక్:
How to Prepare Modak in Telugu:
కావాల్సిన పదార్థాలు :
- బియ్యపు పిండి : ఒక కప్పు
- నెయ్యి : 3 టీస్పూన్స్‌
- బెల్లం తురుము : ఒక కప్పు
- కొబ్బరి తురుము : 2 కప్పులు
- యాలకులు : 3
- ఉప్పు : చిటికెడు
తయారీ విధానం :
- కడాయిలో నెయ్యి వేసి బెల్లం, కొబ్బరి తురుము వేసి కలపాలి. అవసరమైతే కొద్దిగా నీళ్లు పోయొచ్చు.
- దీంట్లో యాలకులు వేసి రెండు నిమిషాలు ఉంచి దించేయాలి.
- ఒక గిన్నెలో నీళ్లు పోసి మరిగించాలి. ఇందులో ఉప్పు, నెయ్యి వేసి కాసేపు ఉంచి దించేయాలి.
- ఈ నీళ్లు చల్లారక ముందే.. బియ్యం పిండి వేసి ఉండలు కట్టకుండా పూరీ పిండిలా కలుపుకోవాలి.
- వీటిని చిన్న ఉండలుగా చేసి పెట్టుకోవాలి. ఈ ముద్దని చిన్న దొప్పలా చేసుకోవాలి.
- దీంట్లో బెల్లం మిశ్రమాన్ని ఉంచి మళ్లీ బంతిలా చేసుకోవాలి. దీన్ని మనకు నచ్చిన రీతిలో ముడుచుకోవచ్చు.
- ఇలా అన్నీ చేసుకున్నాక.. ఇడ్లీ పాత్రలో ఒక గుడ్డ వేసి సిద్ధం చేసిన మోదక్లను ఉంచాలి.
- సుమారు పది నిమిషాల పాటు ఆవిరి మీద ఉడికించుకుంటే గణపయ్యకు ఇష్టమైన మోదకాలు సిద్ధం.
రవ్వ లడ్డూ:
Ravva Laddu Making Process:
కావాల్సిన పదార్థాలు :
- బొంబాయి రవ్వ : ఒక కప్పు
- చక్కెర : ఒక కప్పు
- ఎండు కొబ్బరి పొడి : అర కప్పు
- పాలు : పావు కప్పు
- యాలకులు : 4
- నెయ్యి : 3 టేబుల్ స్పూన్స్‌
- జీడిపప్పు : 10
- కిస్మిస్ : 10
తయారీ విధానం :
- చక్కెర, యాలకులను కలిపి మిక్సీ పట్టాలి. మెత్తటి పొడి అయ్యేవరకు గ్రైండ్‌ చేసి పక్కన పెట్టుకోవాలి.
- ఒక కడాయిలో కొద్దిగా నెయ్యి వేసి కిస్మిస్, జీడిపప్పులను వేయించుకోవాలి. గోల్డెన్ కలర్ వచ్చాక కడాయిలో నుంచి తీసి ఓ ప్లేటులో వేసుకోని పక్కన పెట్టాలి.
- అదే బాండీలో మిగతా నెయ్యి వేసి స్లిమ్లో రవ్వను వేయించుకోవాలి.
- రవ్వ రంగు మారిన తర్వాత పొడి చేసుకున్న చక్కెర, వేయించుకున్న కిస్మిస్, జీడిపప్పులను వేసి కలపాలి.
- చివరగా పాలు వేసి మరికొద్దిసేపు కలుపుకోవాలి.
- ఇప్పుడు స్టౌ మీది నుంచి దించి వేడిగా ఉన్నప్పుడే చేతికి నెయ్యి రాసుకొని లడ్డూలు చేసుకోవాలి. చల్లగా అయితే లడ్డూలు చేయడం కష్టం.
స్వీట్‌ పొంగల్‌
Sweet Pongal Making Process Telugu:
కావాల్సిన పదార్థాలు
- బియ్యం : అర కప్పు
- పెసరపప్పు: అర కప్పు
- బెల్లం తురుము : అర కప్పు
- యాలకుల పొడి : చిటికెడు
- పచ్చ కర్పూరం : చిన్నది
- నెయ్యి : 3 టేబుల్‌స్పూన్‌
- జీడిపప్పు : 12
- కిస్మిస్ : 12
- లవంగాలు : 2
- ఎండు కొబ్బరి ముక్కలు : 2 టేబుల్ స్పూన్స్‌
తయారీ విధానం :
- కుక్కర్‌లో పెసరపప్పు వేయించుకొని దించేయాలి. ఇందులోనే బియ్యం పోసి రెండూ కలిపి బాగా కడగాలి.
- ఆ తర్వాత నీళ్లు పోసి రెండు విజిల్స్‌ వచ్చే వరకు ఉడికించి పక్కన పెట్టుకోవాలి.
- ఒక పెద్ద గిన్నెలో బెల్లం వేసి కొద్దిగా నీళ్లు పోసి సన్నని మంటమీద చిక్కగా అయ్యే వరకు ఉంచి దించి పక్కన ఉంచాలి.
- ఇప్పుడు ముందుగా ఉడికించిన అన్నం, పెసరపప్పును మరీ మెత్తగా కాకుండా పప్పు గుత్తితో మెదపాలి. దీంట్లో బెల్లం పాకం, యాలకుల పొడి వేసి బాగా కలపాలి.
- దీన్ని స్టౌ మీద పెట్టి సన్నని మంటమీద ఉంచాలి. రెండు నిమిషాల తర్వాత నెయ్యి వేసి కలపాలి.
- ఇది అయ్యేలోపు.. చిన్న కడాయిలో నెయ్యి వేసి జీడిపప్పు, కిస్మిస్, లవంగాలు, కొబ్బరి ముక్కలను వేసి వేయించుకోవాలి.
- వీటన్నింటిని ఉడుకుతున్న పొంగల్‌లో వేసి రెండు నిమిషాలు ఉంచి దించేస్తే సరి. దించేముందు పచ్చ కర్పూరం వేసి కలపాలి.
రవ్వ అప్పాలు
How to Make Ravva Appalu Telugu:
కావాల్సిన పదార్థాలు
- బొంబాయి రవ్వ : ఒక కప్పు
- చక్కెర : 3/4 కప్పు
- యాలకులు : 3
- నెయ్యి : 5 టేబుల్‌స్పూన్స్‌
- నూనె : తగినంత
తయారీ విధానం :
- ఒక గిన్నెలో రెండు కప్పుల నీళ్లు పోసి మరిగించాలి.
- నీళ్లు మరుగుతున్నప్పుడు.. కొద్దిగా నెయ్యి వేసి రెండు నిమిషాల తర్వాత రవ్వ వేసి ఉండలు కట్టకుండా కలపాలి.
- 5 నిమిషాలు సన్నని మంటమీద ఉంచి మూత పెట్టి దించేయాలి. కాస్త చల్లారనిచ్చి చక్కెర, యాలకుల పొడి వేసి కలపాలి.
- ఇప్పుడు దీన్ని మళ్లీ స్టౌ మీద పెట్టి సన్నని మంట మీద రెండు నిమిషాలు ఉంచాలి.
- కలిపినప్పుడు తప్ప.. మిగతా సమయంలో మూత పెట్టే ఉంచాలి.
- ఐదు నిమిషాలు అయ్యాక దించేయాలి. ఆ తర్వాత వీటిని చిన్న ఉండలుగా చేసి పెట్టుకోవాలి.
- చేతికి నెయ్యి రాసుకొని వీటిని అప్పాల్లా ఒత్తుకోవాలి. ఇలా పిండి మొత్తం చేయాలి. ఆ తర్వాత బాండీలో నూనె పోసి అప్పాలను బంగారు రంగు వచ్చేవరకు వేయించాలి.
చూశారుగా మీరు కూడా వాటిని ఇంట్లో తయారు చేసి.. బొజ్జ గణపయ్యను ప్రసన్నం చేసుకోండి.
Vinayaka Chavithi 2023 Sep 18th or 19th?: వినాయక చవితి ఎప్పుడు..? 18నా..? 19వ తేదీనా..?
Vinayaka Chavithi 2023 Pooja Vidhanam Telugu : వినాయకుడిని ఎందుకు ఆరాధించాలి..? పూజా విధానం ఏంటి..?
