వానాకాలంలో లభించే మొక్కజొన్నలతో గారెలు చేసుకుంటే... సీజనల్ పోషకాలు మీ శరీరానికి ఇట్టే అందుతాయి. పిల్లలు పెద్దలు ఇష్టంగా తింటారు కాబట్టి, సాయంకాలం ఏ స్నాక్ చేయాలా? అని ఆలోచించే పని ఉండదు. మరి రెసిపీ చూసేసి మీరూ ట్రై చేయండి.
కావాల్సినవి
- మొక్కజొన్న గింజలు - ఒకటింపావు కప్పు
- శెనగపప్పు - అరకప్పు (గంట పాటు నీళ్లలో నానబెట్టాలి)
- ఉల్లిపాయ - ఒకటి (సన్నగా తరిగి పెట్టుకోవాలి)
- పచ్చిమిర్చి - రెండు (సన్నగా తరిగినవి)
- అల్లం - చిన్నముక్క
- జీలకర్ర - అరటీస్పూన్‌
- తరిగిన కొత్తిమీర - కొద్దిగా
- ఉప్పు - రుచికి తగినంత
- నూనె - డీప్‌ ఫ్రైకి సరిపడా
తయారీ..
ముందుగా మిక్సీ జార్‌లో కప్పు మొక్కజొన్న గింజలు, నానబెట్టిన శెనగపప్పు, పచ్చిమిర్చి, అల్లం.. వేసి బరకగా గ్రైండ్‌ చేసుకోవాలి. ఈ మిశ్రమాన్ని ఒక గిన్నెలోకి తీసుకొని, మిగిలిన పావు కప్పు మొక్కజొన్న గింజలు, ఉల్లిపాయ ముక్కలు, జీలకర్ర, ఉప్పు, కొత్తిమీర తరుగు వేసి కలుపుకోవాలి. ఇప్పుడు అరచేతులకు కాస్త నూనె రాసుకొని, ఈ మిశ్రమాన్ని కొద్దికొద్దిగా తీసుకొని మునివేళ్లతో గారెల మాదిరిగా ఒత్తుకోవాలి. ఇప్పుడు బాండీలో నూనె వేడిచేసుకొని ఈ గారెల్ని అందులో వేసి బంగారు వర్ణంలోకి మారేంత వరకు ఫ్రై చేసుకోవాలి. అంతే.. ఎంతో టేస్టీగా ఉండే మొక్కజొన్న గారెలు రెడీ అయినట్లే!
ఇదీ చదవండి: నువ్వుల జొన్న రొట్టెతో ఆరోగ్యం గట్టిగుంటది!
