‘మీకు మాంసాహారం అంటే చాలా ఇష్టమా... మటన్ లేకపోతే ముద్ద దిగదా... మరి, ఓ మూడు నెలలు పూర్తిగా శాకాహారులుగా మారగలరా.. ఊరికే కాదు, అలా ఉండగలిగితే బహుమతిగా 50 లక్షల రూపాయలు అందిస్తాం’ అంటోంది బ్రిటన్కి చెందిన వైబ్రంట్ వీగన్ కంపెనీ. శాకాహార వంటకాలను అమ్మే ఈ సంస్థ తమ కంపెనీలో ‘వీగన్ క్యూరియస్‌ కోఆర్డినేటర్‌’గా పనిచేసేందుకు ఆసక్తి ఉన్నవాళ్లు దరఖాస్తు చేసుకోవచ్చంటూ ప్రకటన విడుదలచేసింది.
దీనికి ఎంపికైనవాళ్లు శాకాహారం తినడం గురించి మూడునెలలపాటు సోషల్‌ మీడియాలో ప్రజలకు అవగాహన కల్పించేలా ప్రచారం చేసినందుకుగానూ రూ.50 లక్షల పారితోషికం ఇస్తారు. అయితే, ఈ ఉద్యోగానికి ఎంపికవ్వాలంటే ఓ షరతు ఉంది. అదేంటంటే... ఆ వ్యక్తి ఇప్పటివరకూ మాంసాహార ప్రియుడై ఉండాలి. ఈ ఫిబ్రవరి ఒకటి నుంచి మూడు నెలల పాటు పూర్తిగా శాకాహారిగా మారిపోవాలి. అలా ఒప్పందం మీద సంతకం చేశాక అతడికి ఈ మూడునెలలకూ సరిపడా శాకాహారాన్ని కంపెనీయే అందిస్తుంది. ఈ సమయంలో ఓ న్యూట్రిషనిస్ట్‌ కూడా అతడి వెంట ఉంటారు. అన్నట్లూ ఈ ఒప్పందం ముగిశాక ఈ ఏడాది మొత్తం కూడా ఆ వ్యక్తి మాంసాహారం తినకుండా ఉండడానికి ఒప్పుకుంటే కోటిరూపాయల విలువైన శాకాహార ఉత్పత్తుల్ని జీవితాంతం ఉచితంగా పంపిస్తుందట వైబ్రంట్ వీగన్ కంపెనీ.
