తూర్పు లద్దాఖ్లో ప్రతిష్టంభనను తొలగించేలా భారత్-చైనా అంగీకరించడం వల్ల పాంగాంగ్ సరస్సు వద్ద ప్రమాదకర స్థితిని నివారించినట్లైంది. ఉపసంహరణ ప్రక్రియ ప్రారంభం కావడానికి(ఫిబ్రవరి 10) ముందు ఇరుదేశాల సైన్యాలు 30-40 మీటర్ల దూరంలో ఉండేవి. పదో విడత సైనిక చర్చల సమయానికి ఆ దూరం కాస్తా 500 మీటర్లకు పెరిగిందని ఈ వ్యవహారంతో సంబంధం ఉన్న అధికారులు 'ఈటీవీ భారత్'కు తెలిపారు.
"ఉపసంహరణ ప్రక్రియ ప్రారంభమయ్యే సమయానికి ఇరుదేశాల సైనికులు ప్రమాదకర స్థితిలో ఉన్నారు. సైన్యం మధ్య దూరం 30-40 మీటర్లు మాత్రమే ఉండేది. అంత దగ్గరగా ఉండే ఏదైనా జరిగేది. కానీ ఇప్పుడు సైన్యాలు వెనక్కి తగ్గాయి. ఇద్దరి మధ్య 500 మీటర్ల దూరం ఉంది."
-అధికారులు
చర్చల్లో పురోగతి వల్ల గల్వాన్ లాంటి ఘటనలు మరోసారి జరగకుండా నివారించినట్లైందని అధికారులు పేర్కొన్నారు. అయితే ఖాళీ చేసిన సైన్యం అరగంటలోనే మళ్లీ ఆ ప్రాంతానికి చేరుకునే విధంగా మోహరించారని చెప్పారు. సరిహద్దు ప్రతిష్టంభనపై వివిధ స్థాయిల్లో చర్చలు జరుగుతున్నాయని తెలిపారు.
"కమాండర్ స్థాయి సైనిక అధికారుల చర్చలు మాత్రమే కాకుండా.. డబ్ల్యూఎంసీసీ(వర్కింగ్ మెకానిజం ఫర్ కన్సల్టేషన్ అండ్ కోఆర్డినేషన్ ఫర్ ఇండియా-చైనా బార్డర్ అఫైర్స్), జాతీయ భద్రతా సలహాదారుల ప్రతినిధుల స్థాయిల్లోనూ సంప్రదింపులు కొనసాగుతున్నాయి. ముఖ్యంగా వివిధ వేదికల్లో రాజకీయ స్థాయిలోనూ చర్చలు జరుగుతున్నాయి."
-అధికారులు
సరిహద్దు ప్రతిష్టంభనకు తెరదించేందుకు ఇప్పటివరకు పది విడతల చర్చలు జరిగాయి. పాంగాంగ్ సరస్సు వద్ద ఉపసంహరణ ప్రక్రియ పూర్తికాగా.. గోగ్రా, హాట్స్ప్రింగ్స్, దెప్సాంగ్ ప్రాంతాల నుంచి బలగాల తరలింపుపై ప్రస్తుతం చర్చలు జరుగుతున్నాయి.
అజెండా రూపకర్తలు
జాతీయ భద్రతా సలహాదారు నేతృత్వంలోని ఉన్నతస్థాయి చైనా స్టడీ గ్రూప్(సీఎస్జీ), కేంద్ర హోంశాఖ కార్యదర్శి, విదేశాంగ కార్యదర్శి, రక్షణ కార్యదర్శి, త్రివిధ దళాల ఉప అధిపతులు, ఇంటలిజెన్స్ బ్యూరో, రీసెర్చ్ అనాలసిస్ వింగ్(రా) అధిపతులు చర్చల కోసం అజెండా రూపొందించడంలో కీలకంగా వ్యవహరిస్తున్నారు. ఈ అజెండా రూపొందించిన తర్వాతే క్షేత్రస్థాయిలో సైన్యం చర్చలు జరుపుతోంది.
భారత్ తరపున చర్చలకు లేహ్లోని 14 కార్ప్స్ కమాండర్ లెఫ్టినెంట్ జనరల్ పీజీకే మేనన్, విదేశాంగ శాఖ సంయుక్త కార్యదర్శి నవీన్ శ్రీవాస్తవ, డీజీఎంఓ(డైరెక్టర్ జనరల్ ఆఫ్ మిలిటరీ ఇంటెలిజెన్స్)కు చెందిన బ్రిగేడియర్ స్థాయి అధికారులు పాల్గొంటున్నారు.
(సంజీవ్ బారువా-సీనియర్ పాత్రికేయులు)
ఇవీ చదవండి:
