వుహాన్‌లో కరోనా వైరస్ వ్యాప్తి చెందినట్లు చైనా ప్రకటించి దాదాపు ఆరునెలలు కావస్తోంది. అతి కొద్ది సమయంలోనే ఈ వైరస్ మహమ్మారిగా మారి- ప్రపంచాన్ని తీవ్ర సంక్షోభంలోకి నెట్టింది. ఈ తరహా జీవ సంక్షోభాల నుంచి రక్షణ పొందాలంటే టీకాయే శరణ్యమని ప్రపంచ దేశాలు బలంగా విశ్వసిస్తున్నాయి. ‘ది వ్యాక్సిన్ అలయన్స్‌’ సీఈఓ సెత్‌ బర్కిలీ ప్రపంచ ప్రజాజీవనం పూర్వస్థితికి రావాలంటే టీకా సరైన ఆయుధమన్నారు. కొవిడ్ టీకా వెలుగు చూడాలంటే దానికయ్యే వ్యయంతో పాటు సమయమూ కీలకమే. అధ్యయనం, ప్రి క్లినికల్, క్లినికల్ ట్రయల్స్ (మానవులపై జరిగే పరిశోధనలు), అనుమతులు, ఉత్పత్తి, పంపిణీలతో మిళితమైన సంప్రదాయ పద్ధతిలో ఒక టీకాకు రూపం రావాలంటే కనీసం 8 నుంచి 15 సంవత్సరాలు పడుతుందని గతానుభవాలు చెబుతున్నాయి. కొవిడ్ టీకా రాక ప్రపంచానికి అనివార్యం, అత్యవసరం అని డబ్ల్యుహెచ్‌ఓ ప్రకటించింది.
'ఆపరేషన్ వార్ప్ స్పీడ్'
ప్రస్తుత ఆత్యయిక పరిస్థితుల దృష్ట్యా ఈ ప్రయోగాలను వేగవంతంగా నిర్వహిస్తూ దగ్గర దారిలో గమ్యాన్ని చేరుకోవాలని ప్రపంచ దేశాలు పరిశోధనలను విస్తృతం చేస్తున్నాయి. 12 నుంచి 18 నెలల్లో లక్ష్యాన్ని సాధించే దిశగా సాగుతున్న ఈ ప్రక్రియ విజయవంతం అవుతుందని వారు ఆశాభావంతో ఉన్నారు. ఒక క్రమ పద్ధతిలో కాకుండా, కలగాపులగంగా టీకాపై పరిశోధనలు నిర్వహించడం అనైతికం అని ప్రివెంటివ్‌ మెడిసిన్‌, వాండర్‌ బిల్ట్‌ యూనివర్సిటీ మెడికల్‌ సెంటర్‌వంటి సంస్థల శాస్త్రవేత్తలు వాదిస్తున్నారు. 2021 సంవత్సరం ఆరంభానికి అమెరికా లోని 300 మిలియన్‌ ప్రజలకు నాణ్యమైన కొవిడ్ టీకాను అందుబాటు లోకి తెచ్చేందుకు ‘ఆపరేషన్ వార్ప్ స్పీడ్’ పేరుతో అమెరికా అధ్యక్షుడు డొనాల్డ్‌ ట్రంప్‌ ఒక ప్రణాళికను సిద్ధం చేశారు.
ఎవరెవరు ఏం చేస్తున్నారు?
కొవిడ్ వ్యాధి కారకమైన జెనెటిక్‌ కోడ్‌ని ‘సార్స్‌ కొవ్‌-2’గా చైనా ప్రకటించిన 63 రోజుల్లోనే మానవాళిపై పరిశోధనలు (హ్యూమన్‌ ట్రయల్స్) అమెరికాలోని సీటల్‌లో, చైనాలో ఆరంభమైనట్లు డబ్ల్యూహెచ్‌ఓ ప్రకటించింది. దాదాపు 73 సంస్థలు తమ ప్రయోగాల ట్రాక్‌ను నమోదు చేసుకున్నట్లుగా తెలిపింది. అమెరికా, చైనా, యూకే, జర్మనీలాంటి దేశాల నుంచి ఎనిమిది సంస్థలు అత్యంత కీలకమైన క్లినికల్ ట్రయల్స్‌కు చేరుకుని ముందు వరసలో ఉన్నాయి. ఈ దశ టీకా తయారీకి ఆయువు పట్టు. టీకా సమర్థత, భద్రతలు ఈ దశలోనే బహిర్గతం అవుతాయి. నాణ్యతపై సంతృప్తి చెందితే ఎఫ్‌డీఏ, యురోపియన్‌ ఏజెన్సీ లాంటి సంస్థలు టీకా తయారీకి అనుమతులు మంజూరు చేస్తాయి. డబ్ల్యూహెచ్‌ఓ నాణ్యతపై భరోసా కల్పించాల్సి ఉంటుంది. ‘ఎంఆర్‌ఎన్‌ఏ-1273’ పేరుతో ‘మోడర్నా’ అనే అమెరికా సంస్థ టీకా తయారీలో తలమునకలై ఉంది. ముప్పై వేల మందిపై మూడో దశ క్లినికల్ ట్రయల్స్‌కు జులైలో సన్నాహాలు చేసుకుంటున్నట్లు మోడర్నా చీఫ్‌ మెడికల్‌ ఆఫీసర్‌ డాక్టర్‌ టాల్‌ జాక్స్‌ తెలిపారు.
అక్టోబర్లో వచ్చేనా.?
‘ఫైజర్‌’ అనే మరో అమెరికా బహుళ జాతి సంస్థ, దాని భాగస్వామి అయిన ‘బయో-ఎన్‌టెక్‌’తో కలిసి ‘బీఎన్‌టీ-162’ అనే పేరుతో ఒక వైపు క్లినికల్ ట్రయల్స్ నిర్వహిస్తూనే మరోవైపు టీకా ఉత్పత్తులకు రంగం సిద్ధం చేసుకుంటూ ఉంది. ఆ సంస్థ సీఈఓ ఆల్బర్ట్‌ బుర్లా తమ పరిశోధనలు ఫలించినట్లైతే అక్టోబరు మాసానికి టీకా గురించి తీపి కబురు ప్రపంచానికి చెప్పగలమన్నారు. ఆక్స్‌ఫర్డ్‌ యూనివర్సిటీతో జత కలిసిన ఆస్ట్రాజెనెటికా ఏజెడ్‌డీ-1222 పేరుతో ఆగస్టులో మూడో క్లినికల్ ట్రయల్‌కు మార్గం సుగమం చేసుకుంటూ ఉంది. బీజింగ్‌కు చెందిన సైనో వాక్‌ కంపెనీ కూడా అమెరికా కంపెనీలతో పోటీ పడుతోంది. సన్నోఫి, రోష్‌, జాన్సన్‌ అండ్ జాన్సన్‌, జీఎస్‌కే మొదలైన బహుళజాతి సంస్థలూ రంగంలో ఉన్నాయి. ఫరీదాబాద్‌కు చెందిన ట్రాన్స్‌లేషనల్‌ హెల్త్‌ సైన్స్‌ అండ్ టెక్నాలజీ ఇన్‌స్టిట్యూట్‌ ఎగ్జిక్యూటివ్‌ డైరెక్టర్‌ గగన్‌దీప్‌ కంగ్‌ తెలిపిన వివరాల మేరకు ‘జైడస్‌ కాడిల్లా, సీరం ఇన్‌స్టిట్యూట్‌, బయోలాజికల్‌ ఈ, భారత్‌ బయోటెక్‌, ఇండియన్‌ ఇమ్యునోలాజికల్స్‌, మిన్‌వ్యాక్స్‌’వంటి భారతీయ సంస్థలూ టీకా తయారీకోసం పరిశోధనలకు పదును పెడుతున్నాయి.
సమన్యాయం అవసరం
అడ్డంకులన్నింటినీ అధిగమించి టీకా ఉత్పత్తులు మొదలైనా పంపిణీ అతి పెద్ద సవాలు కానుందని శాస్త్రవేత్తలు ఆందోళన చెందుతున్నారు. ప్రపంచ ప్రజలందరి అవసరాలకు సరిపడే టీకా డోసులను వెంటనే ఉత్పత్తి చేయడం ఏ ఒక్క కంపెనీకీ సాధ్యం కాని పని. 2009లో స్వైన్‌ ఫ్లూ టీకా ఉదంతంలాగా ఆస్ట్రేలియా, అమెరికా, కెనడాలాంటి సంపన్న దేశాలు టీకాను తమ గుత్తాధిపత్యం లోకి తీసుకుని పేద దేశాలను విస్మరిస్తాయేమో అని వారు ఆవేదన వ్యక్తం చేస్తున్నారు. టీకా పంపిణీలో ధనిక, పేద అసమానతలకు తావు లేకుండా కేటాయింపులు పారదర్శకంగా జరగాలన్నదే డబ్ల్యూహెచ్‌ఓ ఆకాంక్ష.
అందరూ ఏకమైతేనే..
ప్రపంచవ్యాప్తంగా కరోనాపై పోరాడుతున్న వైద్య సిబ్బంది, వృద్ధులు, వ్యాధిగ్రస్తులకు ముందుగా ఈ టీకా ఫలాలు అందడం సముచితంగా ఉంటుందని ఎక్కువ దేశాలు అభిప్రాయపడుతున్నాయి. టీకా తయారీ సంస్థలు సొంతలాభం కొంత మానుకుని అందరికీ అందుబాటులో ఉండేలాగా ధరలను నియంత్రించాలని శాస్త్రవేత్తలు సూచిస్తున్నారు. ప్రపంచ దేశాలన్నీ ఒక్క తాటి పైకి వచ్చి ‘సంఘీభావ కొనుగోలు వ్యవస్థ’ (సాలిడారిటీ పర్చేజింగ్‌ క్లబ్‌) ఏర్పాటు చేసుకుంటే పేద దేశాలకు ఊరట కలుగుతుందని, అందరికీ సమన్యాయం జరుగుతుందనే చర్చ తెర మీదకు వచ్చింది. బిల్‌ అండ్ మిలిండా గేట్స్‌ ఫౌండేషన్‌, ప్రపంచ బ్యాంక్‌, ప్రపంచ ద్రవ్య నిధి లాంటి సంస్థలు పేద దేశాలకు బాసటగా నిలిచేందుకు సంసిద్ధంగా ఉన్నట్లు ఆ సంస్థల ప్రతినిధులు వెల్లడిస్తున్నారు. మానవ మేధస్సుకు, మానవత్వమూ తోడైతే కరోనా కనుమరుగు కాక తప్పదు!
ఇదీ చదవండి: 'కరోనిల్' సేఫేనా? క్లినికల్ ట్రయల్స్ రిజల్ట్ ఏంటి?
