ఈ ప్రపంచంలో ఎక్కడున్నా అందరినీ ఒక్క చోట చేర్చే సోషల్ మీడియా చాలామంది మహిళల పాలిట శాపంగా మారుతోందని చెప్పడం అతిశయోక్తి కాదు. తమ మనసులోని సంతోషాన్ని పంచుకోవడానికి ఏదైనా ఫొటో, వీడియో పోస్ట్ చేస్తే చాలు.. వాటిలోని మంచి కంటే చెడు గురించే వెతకడం, నెగెటివ్గా కామెంట్లు చేయడం.. ఇలా ఇవన్నీ చాలామంది మహిళల్ని మానసికంగా కుంగదీస్తున్నాయి. అయితే లోకులు కాకులు.. వారు అన్న ప్రతి మాటా పట్టించుకోవాల్సిన అవసరం లేదంటోంది బాలీవుడ్ బుల్లితెర బ్యూటీ ఊర్వశీ ధోలాకియా.
‘కొమోలిక’గా పాపులారిటీ!
పాపులర్ హిందీ సీరియల్ ‘కసౌటీ జిందగీ కే’లో కొమోలికా మజుందార్గా నటించి మెప్పించిన ఊర్వశి.. ‘శక్తిమాన్’, ‘చంద్రకాంత’.. వంటి ధారావాహికల్లో మెరిసింది. ‘బిగ్బాస్’ సీజన్ 6 విజేతగా నిలవడంతో పాటు, ‘నచ్ బలియే’ టీవీ షోలో పాల్గొని మరెంతోమందికి దగ్గరైందామె. ఇలా తన వృత్తిగత జీవితంలోనే కాదు.. వ్యక్తిగతంగానూ తన అభిమానులకు అనునిత్యం దగ్గరగానే ఉంటుందామె. ఈ క్రమంలోనే సోషల్ మీడియాలో యాక్టివ్గా ఉండే ఈ ముద్దుగుమ్మ.. తన పూల్ ఫొటోలు, బీచ్ ఫొటోలు, విభిన్న ఫ్యాషనబుల్ దుస్తులు ధరించి తీసుకున్న ఫొటోలు, వీడియోలను తరచూ ఇందులో పోస్ట్ చేస్తుంటుంది. ఇద్దరు కవల మగపిల్లలకు సింగిల్ మదర్గా కొనసాగుతోన్న ఆమె.. సందర్భం వచ్చినప్పుడల్లా బాడీ పాజిటివిటీని చాటుతూ ఎంతోమంది మహిళల్లో సానుకూల దృక్పథం నింపుతుంటుంది. అలా ఇటీవలే ఓ సందర్భంలో భాగంగా బాడీ పాజిటివిటీ, స్ట్రెచ్మార్క్స్ తదితర అంశాల గురించి తన మనసులోని మాటల్ని పంచుకుందీ లవ్లీ మామ్.
అసలు వీటిని సృష్టించిందెవరు?!
మనకు మనం ఎలా నచ్చితే అలా ఉండాలనుకుంటాం.. అంతేకానీ ఎవరో ఏదో అనుకుంటారని మనం ఎంతో ఇష్టపడి తీయించుకున్న ఫొటోలను సోషల్ మీడియాలో పంచుకోవడానికి వెనకాడాల్సిన పనే లేదంటోంది ఊర్వశి.
‘ఈ సమాజంలో కొంతమంది వ్యక్తులు తల్లైన మహిళలను ఎలా దూషిస్తారో నాకు తెలుసు. అలాంటి వాళ్లను నేనొక ప్రశ్న అడగాలనుకుంటున్నా.. పిల్లలు పుట్టాక మహిళలు ఇలాగే ఉండాలన్న నియమాలు అసలు ఎవరు సృష్టించారు? తల్లైన ప్రతి మహిళకు స్ట్రెచ్మార్క్స్ రావడం సర్వసాధారణం. బరువు తగ్గిన వారిలోనూ ఇవి కనిపిస్తాయి. వాటి గురించి కూడా చాలామంది అసహ్యంగా కామెంట్ చేస్తుంటారు. నిజానికి అవి మన శరీరంపై సహజసిద్ధంగా ఏర్పడే ట్యాటూ లాంటి గుర్తులు. నేనైతే నా శరీరంపై ఉన్న స్ట్రెచ్మార్క్స్ విషయంలో గర్వపడుతున్నా. నా శరీరంలో ఒక జీవి ప్రాణం పోసుకుందనడానికి నిదర్శనం ఈ మార్క్స్.. వాటిని నా నుంచి ఎవరూ దూరం చేయలేరు.’
-ఊర్వశీ ధోలాకియా
ఆడవారికీ అది వర్తిస్తుంది!
‘పూల్లో దిగిన ఫొటోలు, బీచ్ ఫొటోలు పోస్ట్ చేసినప్పుడు కూడా తల్లైన మహిళలను చాలామంది చాలా రకాలుగా కామెంట్ చేస్తుంటారు. అదే తండ్రైన మగవారు బీచ్లో షర్ట్ లేకుండా తిరిగినా ఎవరూ ప్రశ్నించరు.. అసలు పట్టించుకోరు! ఇద్దరూ పేరెంట్స్గా ప్రమోషన్ పొందినా ఆడవారికే ఎందుకీ సమస్య ఎదురవుతుంది? మగవారిలా ఆడవారికీ వారికి నచ్చినట్టుగా ఉండే హక్కుంది. అందుకే మీకు అవసరం లేని విషయాల గురించి కామెంట్లు చేస్తూ సమయం వృథా చేసుకోకుండా ఏదైనా ఉపయోగపడే విషయాల గురించి ఆలోచించండి.. అలాగే మనం కూడా ఎవరేమనుకున్నా మన శరీరాన్ని ప్రేమించుకోవాలి.. గౌరవించుకోవాలి.. అప్పుడే ధైర్యంగా అడుగు ముందుకేయగలం..!’ అంటూ తన మాటలతో బాడీ పాజిటివిటీని నింపిందీ బాలీవుడ్ మామ్. నిజమే కదా మరి.. ఊర్వశి చెప్పినట్లుగా ఈ సమాజంలో ఒకరి నిర్ణయాలను, ఇష్టాయిష్టాలను జడ్జ్ చేసే హక్కు ఎవరికీ లేదు.. ఎవరికి నచ్చినట్లుగా వారు ఉండచ్చు.
ఇదీ చూడండి: 'పాస్పోర్ట్ పత్రిక'తో పెళ్లికి ఆహ్వానం