ఏపీలోని పశ్చిమగోదావరి జిల్లా ఆకివీడు వద్ద జాతీయ రహదారిపై జరిగిన రోడ్డు ప్రమాదంలో ఇద్దరు వ్యక్తులు మృతిచెందారు. విజయవాడ నుంచి వీరవాసరం వెళ్తున్న ఓ కారు ఆకివీడు రైస్ మిల్ సమీపంలో ఆగి ఉన్న లారీని ఢీకొని ఎదురుగా వస్తున్న టాటా ఏస్ని ఢీకొట్టింది. ఈ ప్రమాదంలో టాటా ఏస్లో ప్రయాణిస్తున్న పది మంది సురక్షితంగా బయటపడ్డారు. ప్రమాదానికి గురైన కారులో ప్రయాణిస్తున్న ఐదుగురిలో ఒకరు ఘటనా స్థలంలోనే మృతిచెందగా, మరో వ్యక్తి ఆసుపత్రికి తరలిస్తుండగా మరణించాడు. మిగతా ముగ్గురిలో ఒకరి పరిస్థితి విషమంగా ఉన్నందున భీమవరంలోని ఓ ప్రైవేట్ ఆస్పత్రికి తరలించారు. మరో ఇద్దరికి ఆకివీడులోని ప్రైవేట్ ఆస్పత్రిలో చికిత్స అందిస్తున్నారు.
ట్రాఫిక్ అంతరాయం..
ఘటనా స్థలానికి చేరుకున్న ఆకివీడు పోలీసులు సహాయక చర్యలు చేపట్టారు. జాతీయ రహదారిపై సుమారు రెండు కిలోమీటర్ల మేర ఏర్పడిన ట్రాఫిక్ అంతరాయాన్ని తొలగించారు. ప్రమాదానికి కారణమైన కారులో ప్రయాణిస్తున్న వాళ్లంతా వీరవాసరం మండలం వాసులుగా పోలీసులు గుర్తించారు. కేసు నమోదు చేసి దర్యాప్తు చేస్తున్నట్లు తెలిపారు.
ఇదీ చూడండి: ప్రేమించి పెళ్లి చేసుకున్నాడు కానీ... విధి వక్రీకరించింది
