వారంతా కూలీ పనులు చేసుకునేవాళ్లు. పనికెళ్తే కానీ... రెండు పూటలా తినలేరు. అలా రోజులానే టాటా బొలెరోలో వెళ్లారు. ఒక్కసారిగా బండి అదుపుతప్పింది. ఈ ఘటనలో 18 మంది హమాలీలకు గాయాలయ్యాయి. ఈ ప్రమాదం సిద్దిపేట జిల్లా మర్కుక్ మండలం అంగడి కిష్టాపూర్ వద్ద చోటుచేసుకుంది.
వీరంతా అక్కారం బియ్యం గోడౌన్లో పనిచేస్తున్న బీహార్కు చెందిన వలస కూలీలు. చేబర్తి నుంచి అంగడి కిష్టాపూర్ వైపు వస్తుండగా వాహనం అదుపుతప్పి.. ఈ ప్రమాదం జరిగిందని తెలుస్తోంది. 18 మందిలో ఇద్దరు తీవ్రంగా గాయపడినట్లు ఎస్సై శ్రీశైలం తెలిపారు. వీరిని చికిత్స నిమిత్తం గజ్వెల్ ప్రభుత్వ ఆసుపత్రికి తరలించి చికిత్స అందిస్తున్నారు. ఈ ప్రమాదానికి కారణమైన వారిపై కేసు నమోదు చేసి దర్యాప్తు చేస్తున్నట్లు ఎస్సై శ్రీశైలం పేర్కొన్నారు.
