ఓ బాలిక ఫొటోలు, వీడియోలు తీసి బ్లాక్మెయిల్ చేస్తూ ఆమె నుంచి నాలుగు లక్షల రూపాయలు కాజేసిన ముగ్గురిని జీడిమెట్ల పోలీసులు అరెస్టు చేశారు.
అసలు ఏమైందంటే...
కరోనా ప్రభావం వల్ల స్కూళ్లు మూతపడ్డాయి. ప్రభుత్వ సూచనలతో ఇటీవలే అన్లైన్ క్లాసులు ప్రారంభం కావడం వల్ల జీడిమెట్ల అయోధ్యనగర్కు చెందిన ఓ బాలికకు ఆమె తల్లిదండ్రులు ఫోన్ కొనిచ్చారు. ఆ బాలిక ఫోన్లో ఇన్స్ట్రాగ్రాం వాడడం ప్రారంభించింది. అందులో ఆమెకు ముగ్గురు యువకులు పరిచయమయ్యారు. వారంతా కలిసి తరుచూ టిక్టాక్ వీడియోలు, ఫొటో షూట్లు చేశారు.
కొంతకాలానికి వారి అసలు రూపం బయటపడింది. బాలిక ఫొటోలు, వీడియోలు తీసి వాటితో ఆమెను బ్లాక్మెయిల్ చేయడం ప్రారంభించారు. ఆమె నుంచి పలు దఫాలుగా నగదు, గిఫ్ట్ల రూపంలో సుమారు నాలుగు లక్షలు వరకు కాజేశారని పోలీసులు తెలిపారు.
ఎలా బయటపడిందంటే..
కొన్నాళ్లుగా ఇంట్లో డబ్బులు మాయం అవుతున్నట్లు గమనించిన తల్లిదండ్రులు బాలికను గమనించారు. ఈ నెల 14న ఆమె వద్దకు బైక్ కోసం వచ్చిన ముగ్గురు యువకులను కుటుంబ సభ్యులు ప్రశ్నించగా పదోతరగతి మెటీరియల్ కోసం వచ్చామని తెలిపారు. బాలికను గట్టిగా నిలదీయగా అసలు విషయం బయటపెట్టింది. రెండు నెలలుగా సుమారు 4 లక్షల రూపాయలు వారికి ఇచ్చినట్లు వివరించింది.
బాలిక కుటుంబసభ్యుల ఫిర్యాదుతో కేసు నమోదు చేసుకున్న పోలీసులు ముగ్గురు యువకులను అదుపులోకి తీసుకుని విచారించగా వాస్తవాలు చెప్పారని జీడిమెట్ల ఇన్స్పెక్టర్ బాలరాజు వెల్లడించారు.
ఇదీ చూడండి: బెడిసికొట్టిన రిపోర్టర్ డీలింగ్... ట్రాప్లో పడి కిడ్నాప్
