సికింద్రాబాద్లో గోపాలపురం పోలీస్ స్టేషన్ పరిధిలో విషాదం చోటుచేసుకుంది. కాసేపట్లో ఇంటికి వెళ్లాల్సిన వ్యక్తి తిరిగిరాని లోకాలకు వెళ్లారు. ద్విచక్ర వాహనాన్ని గుర్తుతెలియని వాహనం ఢీకొని ఓ విద్యార్థి అక్కడికక్కడే మృతి చెందగా... మరో విద్యార్థి తీవ్రంగా గాయపడ్డారు.
ఏం జరిగిందంటే...
పశ్చిమబంగ తినిగిరి జిల్లా టౌన్లోని నేతాజీనగర్‌కు చెందిన ఆకాశ్ మల్లిక్.. నాలుగేళ్లుగా నాచారం హెచ్ఎంటీ కాలనీలో నివాసం ఉంటూ ఐఐసీటీలో పీహెచ్డీ చేస్తున్నారు. గాంధీనగర్‌లో నివాసం ఉంటున్న స్నేహితుడు నికిత్తో కలిసి ఆదివారం బయటకు వెళ్లారు. తిరిగి ఇంటివద్ద ఆకాశ్ను విడిచిపెట్టేందుకు నికిత్ తన ద్విచక్రవాహనంపై సోమవారం తెల్లవారుజామున 1.45 గంటల సమయంలో బయలుదేరారు. సికింద్రాబాద్ వైఎంసీఏ నుంచి తార్నాక నాచారం వైపుకు వెళ్తుండగా వెనుక నుంచి వచ్చి గుర్తుతెలియని వాహనం ఢీకొట్టింది. తీవ్రంగా గాయపడిన ఆకాశ్ అక్కడికక్కడే మృతిచెందారు. నికిత్కు తీవ్రంగా గాయాలయ్యాయి.
కేసు నమోదు..
ఈ విషయాన్ని తెలుసుకున్న గోపాలపురం పోలీసులు ఘటన స్థలానికి చేరుకుని గాయపడిన నికిత్ను కిమ్స్ ఆస్పత్రికి తరలించారు. శవ పరీక్ష కోసం ఆకాశ్ మృతదేహాన్ని ఉస్మానియా ఆస్పత్రికి తరలించారు. కేసు నమోదు చేసుకుని ప్రమాదానికి కారణమైన వాహనాన్ని గుర్తించే దిశగా పోలీసులు దర్యాప్తు చేస్తున్నారు.
ఇదీ చదవండి: మహిళతో ఘర్షణ...అడ్డంగా దొరికిపోయిన రౌడీ షీటర్
