సైబర్ నేరాలు.. సాయుధుల సాయంతో ఛేదించిన పోలీసులు

సైబర్ నేరగాళ్లు పోలీసులనే టార్గెట్ చేశారు. నకిలీ ఐడీలు క్రియేట్ చేసి.. నేరాలకు పాల్పడుతున్నారు. పోలీసులు మూలాలను వేతికే పనిలో పడ్డారు. డొంకలాగితే విస్తుపోయే నిజాలెన్నో తెలిశాయి. అక్కడికి వెళ్లి ప్రాణాలతో తిరిగిరావడం కష్టమేననే సంకేతం వినిపించింది. మన పోలీసులు వెను దిరగలేదు. మరో "ఖాకీ" సినిమాని లైవ్​లో చూపించేశారు.

ఏకంగా పోలీసుల పేరుతోనే నకిలీ ఫేస్‌బుక్‌ ఖాతాలు తెరిచి, నగదు వసూలు చేస్తున్న నలుగురు సభ్యుల ముఠాను నల్గొండ పోలీసులు చాకచక్యంగా పట్టుకున్నారు. రాష్ట్రానికి చెందిన 81 మంది సహా హిమాచల్‌ప్రదేశ్‌, ఆంధ్రప్రదేశ్‌, తమిళనాడు, కర్ణాటకల్లో 350 మంది పోలీసుల పేరుతో వీరు నకిలీ ఖాతాలు సృష్టించి మోసాలకు పాల్పడుతున్నట్లు గుర్తించారు.

ముఠా గుట్టురట్టు...

రాజస్థాన్‌లోని భరత్‌పూర్‌ జిల్లాకు చెందిన ఈ ముఠాలో ఒకరు మైనర్‌ కావడంతో మిగిలిన ముగ్గురు నిందితులను ఎస్పీ ఏవీ రంగనాథ్‌ మీడియా ముందు ప్రవేశపెట్టారు. భరత్‌పూర్‌ జిల్లా కేత్వాడ మండలానికి చెందిన ముస్తఖీమ్‌ఖాన్‌, షాహిద్‌, సద్దాంఖాన్‌, ఓ మైనర్‌ బాలుడు నాలుగు నెలల నుంచి ఈ దందా నిర్వహిస్తున్నట్లు గుర్తించారు.

నల్గొండ ఎస్పీ పేరుతోనూ ఫేక్ ఐడీ...

ఫేస్‌బుక్‌లో పోలీసు అధికారుల పేరుతో నకిలీ ఖాతాలు సృష్టించి.. వారి స్నేహితుల జాబితాలో ఉన్నవారికి రిక్వెస్ట్‌లు పెట్టి అత్యవసరం పేరుతో డబ్బు పంపాలని మోసాలకు పాల్పడుతున్నారు. నల్గొండ ఎస్పీ పేరుతోనూ నకిలీ ఖాతా సృష్టించారు.

రంగంలోకి ప్రత్యేక బృందం..

ఈ ముఠాను పట్టుకోవడానికి నలుగురు సభ్యుల ప్రత్యేక బృందాన్ని రాజస్థాన్‌కు పంపారు. మెసెంజర్‌లో ఇచ్చిన ఫోన్‌ నంబర్ల ఆధారంగా అక్కడి పోలీసుల సహాయంతో నలుగురు నిందితులను పట్టుకొని నల్గొండకు తీసుకొచ్చారు. వీరి నుంచి రూ.లక్ష నగదు, 8 సెల్‌ఫోన్లు, లాప్‌టాప్‌, 30 సిమ్‌కార్డులు, నకిలీ ఆధార్‌కార్డులు, పలు డాక్యుమెంట్లు స్వాధీనం చేసుకున్నారు.

సాయుధ పోలీసుల సాయంతో...

కేత్వాడ ప్రాంతం.. దేశంలో సైబర్‌ నేరాలకు అడ్డాగా పేరొందింది. ఆ ప్రాంతంలో కొత్తవారు అనుమానాస్పదంగా కనిపిస్తే స్థానికులు రాళ్లతో కొట్టి చంపుతారనే ప్రచారమూ ఉంది. ఈ పరిస్థితిలో నల్గొండ ప్రత్యేక పోలీసు బృందం నిందితులను పట్టుకోవడం అందరి దృష్టినీ ఆకట్టుకుంటుంది.

రెండు రోజుల రెక్కీ...

నల్గొండ రెండో పట్టణ ఇన్‌స్పెక్టర్‌ భాషా నేతృత్వంలో ఎస్సై రాజశేఖర్‌, ఇద్దరు కానిస్టేబుళ్ల బృందం గత నెల 24న భరత్‌పూర్‌ బయల్దేరింది. సెప్టెంబరు 26వ తేదీ సాయంత్రం వీరు అక్కడి ఎస్పీ అమన్‌దీప్‌సింగ్‌ను కలిశారు. ఆయన 25 మంది సాయుధ పోలీసులను వీరితో పంపగా.. ఆ ప్రాంతంలో రెండు రోజులు రెక్కీ నిర్వహించారు.

నేరస్థులకు మద్దతుగా ఓ పోలీసు...

సెల్‌ఫోన్‌ సిగ్నళ్ల ఆధారంగా నిందితుల ఇళ్లను గుర్తించారు. 29న తెల్లవారుజామున 3.30-4.00 గంటల మధ్యలో నిందితుల ఇళ్లలోకి వెళ్లి 9 మందిని అదుపులోకి తీసుకున్నారు. వెంట వచ్చిన పోలీసుల్లో ఒకరు నేరస్థులకు మద్దతుగా సైరన్‌ మోగించడంతో.. మేల్కొన్న ఆ ప్రాంతం వారు ఈ వాహనాల వెంట పడినా.. వెనకాడకుండా నిందితులను భరత్‌పూర్‌ తరలించారు.

నిందితులలో ఒకరి ఫోన్లో నల్గొండ జిల్లా ఎస్పీ రంగనాథ్‌ ఫొటో కనిపించడంతో అతడిని ‘ప్రత్యేకంగా’ విచారించగా గుట్టు రట్టు చేశాడు. అతడికి సహకరించిన మరో ముగ్గురిని అదుపులోకి తీసుకుని.. మిగిలిన వారిని వదిలిపెట్టారు.

ఇదీ చదవండి: పోకిరీలపై కొరడా ఝుళిపించిన షీ టీం బృందాలు