కల్తీపాలు తయారు చేస్తున్న ఇంటిపై ఎస్​ఓటీ పోలీసుల దాడి

కల్తీపాలు తయారుచేసి.. అక్రమంగా రవాణా చేసి విక్రయిస్తున్న ఓ వ్యక్తిని యాదాద్రి భువనగిరి జిల్లా ఎస్​ఓటీ పోలీసులు అదుపులోకి తీసుకున్నారు. ఇద్దరు నిందితులు కల్తీపాలు తయారు చేస్తుండగా.. దాడుల్లో ఒకరు పరారయ్యారు. నిందితుల నుంచి బొలెరో వాహనం, 250 లీటర్ల కల్తీపాలు స్వాధీనం చేసుకున్నట్లు పోలీసులు తెలిపారు.

యాదాద్రి భువనగిరి జిల్లా హైదరాబాద్​ - వరంగల్​ జాతీయ రహదారిపై గల అవుషాపూర్​ సమీపంలోని ఓ ఇంట్లో కల్తీపాలు తయారు చేస్తున్నారన్న సమాచారం అందుకున్న భువనగిరి ఎస్​ఓటీ పోలీసులు దాడులు నిర్వహించారు. దాడుల్లో ఒకరు బీఎన్​ తిమ్మాపూర్​కి చెందిన జంగిటి నర్సింహగా గుర్తించారు. మరో నిందితుడు ఎరుకల భాస్కర్ పరారీలో ఉన్నాడు.

నిందితుని వద్ద 250 లీటర్ల కల్తీపాలు, ఏడు డోలోఫర్​ మిల్క్​ పౌడర్​ ప్యాకెట్లు, బొలెరో వాహనం స్వాధీనం చేసుకున్నట్టు పోలీసులు తెలిపారు. నర్సింహను ఘట్​కేసర్​ పోలీస్​ స్టేషన్​లో అప్పగించారు. పోలీసులు కేసు నమోదు చేసుకొని దర్యాప్తు జరుపుతున్నారు.

ఇదీ చదవండి: 'కేంద్రమే అప్పు తీసుకుని రాష్ట్రాలకు చెల్లించాలి'