పశ్చిమాసియా దేశాల్లో కరోనా 2.0పై తీవ్ర హెచ్చరికలు జారీచేసింది ప్రపంచ ఆరోగ్య సంస్థ(డబ్ల్యూహెచ్ఓ). శీతాకాలంలో వైరస్ వ్యాప్తి మరింత అధికమయ్యే ప్రమాదముందని డబ్ల్యూహెచ్ఓ పశ్చిమాసియా రీజనల్ డైరక్టర్ అహ్మద్ అల్మంధారి అన్నారు. ఈ నేపథ్యంలో కొవిడ్ మార్గదర్శకాలను మరింత కఠినతరం చేయాలని సూచించారు.
ప్రపంచదేశాలతో పోలిస్తే పశ్చిమాసియా దేశాల్లో వైరస్ వ్యాప్తి అధికంగా ఉందన్నారు అహ్మద్. ఈ ఏడాది ఆరంభంలో కఠిన లాక్డౌన్ అనంతరం భద్రతా చర్యలు క్రమంగా తగ్గిపోయాయని ఆందోళన వ్యక్తం చేసారు. మాస్కులు ధరించడం, భౌతికదూరం వంటి నిబంధనలు తప్పనిసరిగా పాటించడంతోనే కొవిడ్ వ్యాప్తిని అరికట్టవచ్చని పునరుద్ఘాటించారు.
పశ్చిమాసియా ప్రాంతంలో ఇప్పటివరకు 36లక్షల కరోనా కేసులు నమోదవ్వగా.. సుమారు 76వేల మందికిపైగా మృతిచెందారు. వారం రోజుల వ్యవధిలో 60శాతానికిపైగా కేసులు ఇరాన్లోనే బయటపడ్డాయి. జోర్డన్, మొరాకోలోనూ బాధితుల సంఖ్య క్రమంగా పెరుగుతోంది. పాక్లోనూ అన్లాక్ కారణంగా శీతాకాలంలో కొవిడ్ కేసులు ఆందోళనకర స్థాయిలో పెరుగుతున్నట్టు అధికారులు తెలిపారు.
ఇదీ చదవండి: కరోనా వాస్తవ కేసుల సంఖ్య 6.2 రెట్లు అధికం!
