దశాబ్దాలుగా మాఫియా గుప్పిట్లో కీలుబొమ్మైన టర్కీ.. మళ్లీ వారి కనుసైగల్లోనే నడుస్తుందా? 1970 నుంచి మాఫియా శాసించిన టర్కీ.. వారి దుర్మార్గాల నుంచి బయటపడి దశాబ్ద కాలం కావొస్తున్నట్లు అనిపిస్తున్నా.. పరోక్షంగా వారే టర్కీని నడిపిస్తున్నారా?
2009 నుంచి గాడ్ ఫాదర్లు(మాఫియా డాన్స్) కొందరు కటకటాల్లోకి వెళ్లిపోయినా.. మరికొందరు కోర్టుల చుట్టూ తిరుగుతున్నా.. "గాడ్ ఫాదర్స్.. అందరూ గాఢ నిద్రలో ఉన్నారని" 2011లో ఓ సీనియర్ పోలీసు అధికారి పేర్కొన్నా.. టర్కీకి అన్అఫిషియల్ కింగ్స్ గాడ్ ఫాదర్సేనా?
అనుమానంగానైనా సరే అవుననే సమాధానం వస్తోంది. ఇప్పుడెందుకు సడెన్గా ఈ విషయాలు చెప్పుకోవాల్సి వస్తోంది అనుకుంటున్నారా? మాములుగా అయితే ఇవి పట్టించుకోవాల్సిన అవసరం లేదు. కానీ.. మోస్ట్ వాంటెడ్ క్రిమినల్, ఆర్థిక నేరస్థుడు సెదెత్ పీకర్ (రెసెప్ తయ్యిప్ ఎర్డోగాన్ పార్టీకి ఒకప్పటి మద్ధతుదారుడు) యూట్యూబ్లో సంచలన విషయాలు వెల్లడించడం వల్ల ఇది మళ్లీ చర్చకు వచ్చింది.
ఇంతకీ ఆయనేం చెప్పారంటే..
- సిరియాలోని అల్ఖైదా ఉగ్రవాద సంస్థకు ఎర్డోగాన్ మాజీ భద్రత సలహాదారు ఆయుధాలు సరఫరా చేశారని ఆరోపించాడు.
- అప్పట్లో కజక్ జర్నలిజం విద్యార్థిని, మాజీ హోంమంత్రి మెహ్మెత్ అగర్ కుమారుడు, ప్రస్తుతం అధికార పార్టీ చట్టసభ్యుడు తోల్గా.. రేప్ చేసి చంపేసి.. అది అనుమానస్పద మృతిగా మార్చాడని ఆరోపించారు.
- మాజీ ప్రధాని బినాలీ ఇల్దిరిమ్స్ కుమారుడికి డ్రగ్స్ స్మగ్లింగ్లో భాగస్వామ్యం ఉందని తెలిపాడు.
- అధికార పార్టీలో అసమ్మతి జ్వాలలు ఎగిసినప్పడు వాటిని ఆర్పడానికి సహాయపడ్డానని కానీ అవన్నీ మర్చిపోయి ప్రస్తుత హోం మంత్రి సులేమాన్ సోయ్లూ తనను మోసం చేశారని ఆరోపించాడు.
అయితే ఈ ఆరోపణలకు ఆధారాలు మాత్రం చూపలేదు.
ఈ వీడియో విడుదలైన కొన్ని నిమిషాల్లోనే మిలియన్ల మంది వీక్షించారు. కాగా ఈ ఆరోపణలపై చాల కాలంగా మౌనం వహిస్తూ వస్తున్న ఎర్డోగాన్ మే 26న నోరు విప్పారు. అవన్నీ అవాస్తవమని ఒక్కమాటలో కొట్టి పారేశారు. కానీ లేటెస్ట్గా సెదెత్ వీడియోలో వెల్లడించిన పై విషయాలు నమ్మేవిగా ఉన్నాయని విశ్లేషకులు భావిస్తున్నారు. దీంతో టర్కీ ప్రభుత్వం చాలా 'క్లీన్' అని చెప్పుకున్న అధ్యక్షుడు రెసెప్ తయ్యిప్ ఎర్డోగాన్ మాటలు వట్టివేనని అనుకుంటున్నారు.
ఇదీ చదవండి: ఉగ్రసంస్థలతో ఆ అధ్యక్షుడికి సన్నిహిత సంబంధాలు
