పాలస్తీనాతో ఉద్రిక్తతలు తగ్గించాలని అమెరికా అధ్యక్షుడు జో బైడెన్ ఇచ్చిన పిలుపును ప్రధాని బెంజమిన్ నెతన్యాహు తిరస్కరించిన కొద్ది గంటలకు గాజాపై వాయు దాడులతో విరుచుకుపడింది ఇజ్రాయెల్. ఈ ఘటనలో ఒకరు మరణించగా అనేకమంది గాయపడినట్టు తెలుస్తోంది.
నలుగురు హమాస్ కమాండర్ల నివాసాలను లక్ష్యంగా చేసుకుని ఈ దాడులు జరిపినట్టు ఇజ్రాయెల్ మిలిటరీ వెల్లడించింది. ఆ నివాసాల్లో ఉన్న ఆయుధాల నిల్వలను, మిలిటరీకి చెందిన మౌలికవసతులను ధ్వంసం చేయడానికే దాడులు చేసినట్టు స్పష్టం చేశారు.
తాజా దాడులతో గాజా దద్దరిల్లింది. ముఖ్యంగా ఖాన్ యూనిస్, అల్-సాఫ్టవి ప్రాంత ప్రజలు భయాందోళనకు గురయ్యారు. సొంత నివాసాలకు దూరంగా ఉంటున్నారు.
పరిస్థితి విషమం...
పాలస్తీనా-ఇజ్రాయెల్ మధ్య పరిస్థితి రోజురోజుకు ముదురుతోంది. ఇప్పటివరకు జరిగిన దాడుల్లో 227మంది పాలస్తీనావాసులు ప్రాణాలు కోల్పోయారు. ఇందులో 64మంది చిన్నారులు, 38మంది మహిళలు ఉన్నారు. 1,620మందికిపైగా మంది క్షతగాత్రులయ్యారు. 20మంది హమాస్, ఇస్లామిక్ జిహాద్ సభ్యులు మరణించారు. మొత్తం మీద 58వేల మంది ఇళ్లను విడిచి వసలవెళ్లిపోయారు.
పాలస్తీనా నిరసనకారులు, ఇజ్రాయెల్ పోలీసులు మధ్య ఇటీవలే చెలరేగిన ఘర్షణలు రెండు దేశాలను యుద్ధం అంచుకు నెట్టాయి. అప్పటి నుంచి ఇజ్రాయెల్ మిలిటరీ- హమాస్ ఉగ్రవాదులు ఒకరిపై ఒకరు రాకెట్ దాడులతో విరుచుకుపడుతున్నారు. ఈ పరిస్థితులపై ప్రపంచ దేశాలు ఆందోళన వ్యక్తం చేస్తున్నాయి. ఉద్రిక్తతలు తగ్గించేందుకు ప్రయత్నించాలని, మిత్రదేశమైన ఇజ్రాయెల్పై అమెరికా అధ్యక్షుడు జో బైడెన్ బుధవారం ఒత్తిడిపెంచారు. వీటిని పక్కనపెట్టి, ఇజ్రాయెల్లో శాంతి, భద్రతలను స్థాపించేంతవరకు దాడులను ఆపబోమని స్పష్టం చేశారు నెతన్యాహు.
ఇదీ చూడండి:- ఇజ్రాయెల్ దాడుల్లో 6 నెలల మృత్యుంజయుడు!
