ఈజిప్ట్లోని అలెగ్జాండ్రియా నగరంలో ఘోర ప్రమాదం జరిగింది. మూడంతస్తుల భవనం కుప్పకూలింది. ఈ దుర్ఘటనలో ఐదుగురు మరణించారు. అందులో ఇద్దరు యువకులు ఉన్నట్లు అధికారులు తెలిపారు. శిథిలాల కింద ఇంకా ఎవరైనా చిక్కుకొని ఉంటారనే అనుమానంతో సహయక చర్యలు చేపట్టారు అధికారులు.
ప్రమాదం జరిగిన సమయంలో రెండు కుటుంబాలకు చెందిన 9 మంది భవనంలో ఉండిపోయినట్లు తమకు ప్రాథమిక సమాచారం అందిందని అలెగ్జాండ్రియా గవర్నర్ మొహమ్మద్ ఎల్ షరీప్ తెలిపారు. ప్రమాదనికి గురైన భవనం 1940లో నిర్మించినదిగా పేర్కొన్నారు.
అయితే.. ప్రమాదానికి గల కారణాలు ఇంకా తెలియరాలేదు.
భవనాలు కుప్పకూలటం ఈజిప్ట్లో కొత్తేమి కాదు. ప్రతిఏటా ఏదో ఒకచోట ప్రమాదం జరుగుతూనే ఉంది. అలెగ్జాండ్రియా, కైరో వంటి పెద్ద నగరాల్లో స్థిరాస్తి వ్యాపారులు తమ ఇష్టానుసారం నిర్మాణాలు చేపట్టిన దాఖలాలు ఉన్నాయి. ప్రభుత్వ అనుమతి లేకుండా అదనపు అంతస్తులను కట్టడం సర్వసాధారణంగా మారింది. ఈ క్రమంలో ఇటీవలే దేశవ్యాప్తంగా అక్రమ నిర్మాణాల కూల్చివేతను చేపట్టింది అక్కడి ప్రభుత్వం. నిబంధనలు ఉల్లంఘించిన వారిపై కేసులు నమోదు చేసి జైలుకు తరలిస్తోంది.
ఇదీ చూడండి: లైవ్ వీడియో: చెట్టు రూపంలో కమ్మేసిన మృత్యువు
