Shooting in US gun range: అమెరికా గ్రాంట్విల్లోని ఓ షూటింగ్ రేంజ్లో కాల్పులు జరిగాయి. ఓ దుండగుడు చేసిన కాల్పుల్లో గన్ రేంజ్ యజమాని, ఆయన భార్య, మనవడు ప్రాణాలు కోల్పోయారు. కాల్పుల అనంతరం అక్కడి నుంచి 40 ఆయుధాలను దోచుకెళ్లాడని గ్రాంట్విల్ పోలీసులు తెలిపారు. శుక్రవారం సాయంత్రం ఈ ఘటన జరిగిందని చెప్పారు. రాత్రి 8 గంటలకు ఘటనాస్థలికి చేరుకున్న అధికారులు.. 'లాక్ స్టాక్ అండ్ బ్యారెల్' షూటింగ్ రేంజ్ యజమాని థామస్ హాక్(75) మృతదేహాన్ని గుర్తించారు. అతడి భార్య ఎవెలిన్(75), ల్యూక్(17) శవాలు పక్కనే పడి ఉన్నట్లు తెలిపారు.
Grantville gun range shooting: 'వేసవి సెలవుల నేపథ్యంలో ల్యూక్ తన తాత ఇంటికి వచ్చాడు. షూటింగ్ రేంజ్లో తాతకు సహకరించేవాడు. హాక్ కుటుంబం 30 ఏళ్లుగా ఈ షూటింగ్ రేంజ్ నిర్వహిస్తోంది. ఇక్కడ స్థానికంగా వీరికి మంచిపేరు ఉంది. సాయంత్రం 5.30 గంటలకు ఈ ఘటన జరిగింద'ని పోలీసులు వివరించారు. సాధారణంగా ఆ సమయంలో గన్ రేంజ్ మూసి ఉంటుందని చెప్పారు. హాక్ కుమారుడు రిచర్డ్ ఘటన సమయంలో బయటకు వెళ్లాడని తెలిపారు. మృతదేహాలను అతడే ముందుగా గుర్తించాడని స్పష్టం చేశారు.
అయితే, ఈ ఘటనకు పాల్పడింది ఎవరనేది ఇంకా తెలియలేదు. గన్ రేంజ్ నుంచి 40 తుపాకులు గల్లంతైనట్లు గుర్తించారు. సీసీటీవీ కెమెరాలను సైతం దొంగలించారు. భారీగా ఆయుధాలు తీసుకొని పారిపోయిన నేపథ్యంలో పోలీసులు.. ఈ కేసును తీవ్రంగా పరిగణిస్తున్నారు. నిందితుల వివరాలు తెలియజేసినవారికి రూ.11.40 లక్షల(15 వేల డాలర్లు) నగదు అందిస్తామని ప్రకటించారు.
ఇదీ చదవండి: 'సంక్షోభం నుంచి బయటపడాలంటే.. 300 కోట్ల డాలర్లు కావాలి'
