ఆస్ట్రేలియాలో కనిపించకుండా పోయిన రేడియోధార్మిక క్యాప్సూల్ ఎట్టకేలకు దొరికింది. న్యూమాన్‌, మైనింగ్ పట్టణంలోని గ్రేట్ నార్తర్న్ హైవేపై క్యాప్సూల్ కనుగొన్నట్లు అధికారులు తెలిపారు. క్యాప్సూల్ నుంచి వెలువడే రేడియేషన్‌ను గుర్తించే ప్రత్యేక పరికరాల ద్వారా దాని ఆచూకీ తెలుసుకున్నట్లు వెల్లడించారు. హైవేపైనే ఆరు రోజులు గాలింపులు జరిపిన అనంతరం ఇది దొరికినట్లు అధికారులు పేర్కొన్నారు. అధికారుల బృందం 70 కిలోమీటర్ల వేగంతో గ్రేట్ నార్తర్న్ హైవేపై వాహనంలో వెళుతున్న సమయంలో.. క్యాప్యూల్ రేడియేషన్‌ను ప్రత్యేక పరికరాలు పసిగట్టాయి. దీంతో అక్కడే వాహనం నిలిపిన అధికారులు.. రోడ్డు పక్కన రెండు మీటర్ల దూరంలో పడి ఉన్న క్యాప్యూల్ను స్వాధీనం చేసుకున్నారు.
కొన్ని రోజులు క్రింత కనిపించకుండా పోయిన ఈ చిన్న క్యాప్సూల్.. ఆస్ట్రేలియా అధికారులను హడలెత్తిచింది. దీనికి కారణం.. అందులో రేడియో ధార్మికత పదార్థం 'సీజియం- 137' ఉండటమే. దీనిని మైనింగ్ కార్యకలాపాల్లో వినియోగిస్తారు. రేడియేషన్‌ నేపథ్యంలో ఆ గుళికను తాకడం లేదా దగ్గర ఉంచుకోవడం తీవ్ర అనారోగ్యానికి దారితీస్తుందని, కాలిన గాయాలవుతాయని అధికారులు హెచ్చరించారు. ఈ నేపథ్యంలో అటువంటి వస్తువు ఏదైనా కనిపిస్తే దూరంగా ఉండాలని కాప్యూల్ పోయిన సమయంలో అధికారులు ప్రజలకు సూచించారు.
6 మి.మీల వ్యాసం, 8 మి.మీల పొడవు ఉండే ఈ క్యాప్సూల్‌ను ఇటీవల ఓ ట్రక్కులో పశ్చిమ ఆస్ట్రేలియా న్యూమన్‌ ఉత్తర ప్రాంతంలోని ఓ సైట్ నుంచి పెర్త్‌కు రవాణా చేస్తుండగా.. మార్గమధ్యలో ఎక్కడో పడిపోయింది. దీంతో అప్రమత్తమైన అధికారులు.. గాలింపు చర్యలు ముమ్మరం చేశారు. మొత్తం 1400 కి.మీల మేర వెతుకులాట కొనసాగించారు.
క్యాప్సూల్ సురక్షితంగానే ఉందని ఎటువంటి గాయాలు, మార్పులు కనిపించలేదని ఆ దేశ చీఫ్ హెల్త్ ఆఫీసర్ ఆండీ రాబర్ట్‌సన్ తెలిపారు. కాగా క్యాప్సూల్ ట్రక్ నుంచి ఎలా కిందపడింది అన్న దానిపై దర్యాప్తు జరుపుతున్నట్లు అధికారులు తెలిపారు. నివేదికను ఆరోగ్య శాఖ మంత్రికి అందజేయనున్నట్లు వెల్లడించారు.
