North Korea news reader woman: కొరియా సంప్రదాయ వస్త్రధారణ.. ప్రజల్లో దేశభక్తిని ఉప్పొంగించేలా ఉండే భావోద్వేగభరిత స్వరం.. ఐదు దశాబ్దాలు పైబడిన అనుభవం.. ఇదంతా ఉత్తర కొరియా అధికారిక టీవీ ఛానల్ న్యూస్క్యాస్టర్ రీ చున్ హీ(79) గురించే. ఒకప్పటి దేశాధినేత మరణం మొదలు.. ప్రస్తుత నియంత జరిపే అణుపరీక్షలు వరకు.. ఉత్తర కొరియాకు సంబంధించిన కీలక వార్తలన్నింటినీ ప్రజలకు తెలియచేసే రీ చున్ హీ.. విదేశీయులకూ సుపరిచితమే. కేసీఎన్ఏ టీవీ ఛానల్లో వార్తలు చదువుతూ 'పింక్ లేడీ'గా పాశ్చాత్య దేశాల్లో పేరొందిన ఆమె.. ఇప్పుడు తనే వార్తగా మారారు.
కిమ్ స్పెషల్ గిఫ్ట్: రీ చున్ హీకి బుధవారం అదిరిపోయే కానుక ఇచ్చారు ఉత్తర కొరియా దేశాధినేత కిమ్ జోంగ్ ఉన్. పాంగ్యాంగ్లో నిర్మించిన విలాసవంతమైన ఇంటిని ఆమెకు అందజేశారు. స్వయంగా ఆ ఇంటికి వెళ్లి రీ చున్తో కలియతిరిగిన కిమ్.. ఆమె మెట్లు ఎక్కడంలో ఇబ్బంది పడకుండా చూసేందుకు ప్రత్యేక చర్యలు చేపట్టినట్లు ఆ దేశ మీడియా వెల్లడించింది. అయితే అవేంటో చెప్పలేదు.
"విప్లవాత్మక అధికార ప్రతినిధిగా బాల్యం నుంచి 50ఏళ్లకుపైగా సేవలు అందించిన రీ చున్కు పార్టీ రుణపడి ఉంటుంది. ఆమె ఆరోగ్యంగా ఉంటూ పార్టీ కోసం ఇదే ఉత్సాహంతో పనిచేస్తారని ఆశిస్తున్నా" అని కిమ్ అన్నట్లు కేసీఎన్ఏ టీవీ ఛానల్ గురువారం తెలిపింది. "ఈ ఇల్లు ఓ అద్భుతమైన హోటల్లా ఉంది. అధికార పార్టీ ధర్మగుణానికి ముగ్ధులై, కృతజ్ఞతగా మా కుటుంబసభ్యులు అందరూ రాత్రంతా ఏడుస్తూనే ఉన్నారు" అని రీ చున్ హీ చెప్పారని కేసీఎన్ఏ వెల్లడించింది.
రీ చున్తో పాటు పార్టీ కోసం పని చేస్తున్న మరికొందరికి కిమ్ బుధవారం విలాసవంతమైన ఇళ్లను కానుకగా అందజేశారు. 1970లలో ఉత్తర కొరియా వ్యవస్థాపకుడు, కిమ్ తాత అయిన కిమ్ ఇల్ సంగ్ నివాసం ఉన్న చోటే ఈ ఇళ్లు నిర్మించారు. శుక్రవారం కిమ్ ఇల్ సంగ్ 110వ జయంతి నేపథ్యంలో రాజభక్తి ప్రదర్శించిన వారందరినీ ఇలా సత్కరించి, ఉత్తర కొరియాలోని ఉన్నత వర్గాల్లో తన స్థానాన్ని సుస్థిరం చేసుకోవాలన్నది కిమ్ ఆలోచనని నిపుణులు అంటున్నారు.
కేబినెట్ హోదాతో..: రీ చున్ హీ.. 1970లలో, ఉత్తర కొరియా ఇంకా కిమ్ ఇల్ సంగ్ పాలనలో ఉండగానే ఆ దేశ అధికార టీవీ ఛానల్లో చేరారు. అప్పటి నుంచి దాదాపు ప్రతి ముఖ్యమైన వార్తను ఆమె ద్వారానే ప్రజలకు అందించింది కేసీఎన్ఏ. ప్రస్తుతం 79ఏళ్ల వయసున్న రీ చున్కు.. కేబినెట్ సభ్యురాలి స్థాయిలో వసతులు, గౌరవమర్యాదలు ఉంటాయని సమాచారం. గతేడాది మిలిటరీ పరేడ్లో కిమ్ జోంగ్ ఉన్ పక్కనే కూర్చుని, భుజంపై చేయి వేసి, ఆయనతో మాట్లాడిన వీడియో.. రీ చున్ స్థాయిని తెలియచేస్తుందన్నది విశ్లేషకుల మాట.
