అమెరికాలో కాల్పులు కలకలం సృష్టించాయి. ఉటా రాష్ట్రంలోని ఎనోచ్ సిటీలో తుపాకీ గాయాలతో 8 మంది మృతదేహాలు లభ్యమయ్యాయని పోలీసులు తెలిపారు. అందులో 5 పిల్లలు ఉన్నట్లు చెప్పారు.
ఓ ఇంట్లో సాధారణ తనిఖీ నిమిత్తం వెళ్లినప్పుడు ఈ మృతదేహాలు తమకు లభ్యమయ్యాయని పోలీసులు తెలిపారు. నిందితుడు వివరాలు ఇంకా తెలియాల్సి ఉందని.. దీనిపై దర్యాప్తు చేస్తున్నట్లు అధికారులు చెప్పారు. ఈ హత్యలకు గల కారణాలను మాత్రం వెల్లడించలేదు.
ఎనోచ్ నగరంలో 8000 మంది నివసిస్తారు. ఉటా రాజధాని సాల్ట్ లేక్ సిటీకి ఈ నగరం 245 మైళ్ల దూరంలో ఉంటుంది. ఈ ఘటనపై ఉటా రాష్ట్ర గవర్నర్ స్పెన్సర్ కాక్స్ స్పందించారు. మృతుల కుటుంబాలకు సానుభూతి తెలియజేస్తూ ట్వీట్ చేశారు.
