Corona deaths worldwide: కరోనా వైరస్ లేదా ఆరోగ్య రంగంపై కొవిడ్ మహమ్మారి ప్రభావం కారణంగా ప్రపంచవ్యాప్తంగా గత రెండేళ్ల కాలంలో కోటిన్నర మంది ప్రాణాలు కోల్పోయారు. ఈ మేరకు ప్రపంచ ఆరోగ్య సంస్థ డబ్ల్యూహెచ్ఓ అంచనా వేసింది. జనవరి 2020 నుంచి 2021 డిసెంబర్ వరకూ కొవిడ్ వలన లేదా ఆరోగ్య రంగంపై కరోనా ప్రభావం కారణంగా 1.33 కోట్ల నుంచి 1.66 కోట్ల మంది వరకూ మరణించి ఉండొచ్చని.. డబ్ల్యూహెచ్ఓ శాస్త్రవేత్తలు అంచనావేశారు. కరోనా రోగులతో ఆస్పత్రులు నిండుకోవటంతో వివిధ జబ్బులతో బాధపడుతున్న వారు చికిత్సకు దూరమైనట్లు పేర్కొంది.
వివిధ దేశాల ప్రభుత్వాలు అందించిన సమాచారం, జాన్‌ హాప్‌కిన్స్ యూనివర్సిటీ గణాంకాలు సహా స్టాటిస్టికల్ మోడలింగ్ ద్వారా డబ్ల్యూహెచ్ఓ శాస్త్రవేత్తలు కోటిన్నర మరణాలు సంభవించి ఉండొచ్చని అంచనా వేశారు. దేశాల సమాచారం, జాన్‌ హాప్ కిన్స్ యూనివర్సిటీ లెక్కలు, కొవిడ్ కారణంగా 60 లక్షల మంది చనిపోయినట్లు వెల్లడిస్తుండగా దీనికి రెట్టింపు సంఖ్యలో ప్రాణాలు కోల్పోయి ఉండొచ్చని డబ్ల్యూహెచ్ఓ అంచనా వేసింది. ఆగ్నేయ ఆసియా, ఐరోపా, అమెరికాలోనే ఎక్కువ మరణాలు సంభవించాయని పేర్కొంది. ఈ గణాంకాలు భవిష్యత్తులో మరోసారి ఇలాంటి మహమ్మారులు తలెత్తితే ఎలా ఎదుర్కొవాలనే విషయంలో ఉపయోగపడతాయని పేర్కొంది.
మెర్స్ విజృంభణ తర్వాత దక్షిణ కొరియా ప్రజా ఆరోగ్య రంగంలో అధిక పెట్టుబడులు పెట్టిందన్న డబ్ల్యూహెచ్ఓ.. ఫలితంగా దక్షిణ కొరియా తలసరి మరణాల రేటు అమెరికా తలసరి మరణాల రేటులో 20వ వంతు మాత్రమే ఉన్నట్లు పేర్కొంది. ఈ నేపథ్యంలో మరోసారి ఇలాంటి మహమ్మారులు తలెత్తితే ఎదుర్కొనేలా తమ సామర్థ్యాన్ని మెరుగుపరుచుకోవటంపై దేశాలు దృష్టి సారించాలని సూచించింది.
