అమెరికాలో కాల్పులు కలకలం సృష్టించాయి. కాలిఫోర్నియా రాష్ట్రంలోని విసాలియా సిటీలో జరిగిన కాల్పుల్లో ఆరుగురు మృత్యువాతపడ్డారు. ఇందులో ఓ మహిళతోపాటు ఆమె ఆరు నెలల చిన్నారి మరణించారు. ఉదయం 3.30 గంటల సమయంలో ఓ ఇంట్లో కాల్పులు జరుగుతన్నాయనే సమాచారం వచ్చిందని తులారే కౌంటీ అధికారి షెరిఫ్ వెల్లడించారు. వెంటనే అప్రమత్తమై వెళ్లగా.. ఆ ఇంట్లో ఐదు మృతదేహాలను గుర్తించామని.. మరో వ్యక్తి తీవ్రంగా గాయపడ్డట్టు తెలిపారు. ఆ వ్యక్తి ఆస్పత్రికి తీసుకెళ్లిన కాసేపటికి మరణించాడని చెప్పారు.
కాగా, ఈ దారుణానికి పాల్పడిన ఇద్దరు అనుమానితుల కోసం పోలీసులు గాలింపు చర్యలు చేపట్టారు. ఇవి సాధారణంగా జరిగిన హత్యలు కావని.. ఓ కుటంబాన్ని టార్గెట్ చేసుకుని హత్యచేశారని తెలిపారు.
ఘోర రోడ్డు ప్రమాదం.. 19 మంది మృతి..
పశ్చిమ ఆఫ్రికా దేశం సెనెగల్లో ఘోర రోడ్డు ప్రమాదం జరిగింది. వేగంగా వస్తున్న ఓ బస్సు.. గాడిదను తప్పించబోయి ఓ ట్రక్కును ఢీకొట్టింది. ఈ ప్రమాదంలో 19 మంది మరణించారు. ఇంకా చాలా మంది గాయపడ్డారని అధికారులు వెల్లడించారు. ఈ ప్రమాదం ఎన్గెన్ సార్ ప్రాంతంలో జరిగినట్లు తెలిపారు. ఈ ఘటనపై సెనెగల్ అధ్యక్షుడు మాకీ సాల్ స్పందించారు. మృతుల కుటుంబాలకు ప్రగాఢ సానుభూతి తెలియజేశారు. క్షతగాత్రులు త్వరగా కోలుకోవాలని ప్రార్థించారు.
కాంగోలో బాంబు దాడి.. బాధ్యత వహించిన ఇస్లామిక్ స్టేట్
ఆఫ్రికా దేశం కాంగోలోని కాసింది టౌన్లో ఉన్న ఓ చర్చిపై ఆదివారం బాంబు దాడి జరిగింది. ఈ ఘటనలో మృతుల సంఖ్య 14కు చేరింది. దాదాపు 63 మంది గాయపడ్డట్లు అధికాలు తెలిపారు. కాగా, దాడికి తాము బాధ్యత వహిస్తున్నట్లు ఇస్లామిక్ స్టేట్ ప్రకటించింది. ఈ మేరకు ఓ ప్రకటన విడుదల చేసింది. 'కాంగోలీస్ భద్రత దళాలు ముజాహిద్దీన్పై చేస్తున్న దాడులు వారికి ఓటమిని, నష్టాన్ని చేకూరుస్తాయి.' అని ప్రకటనలో పేర్కొంది. బాంబు దాడిలో 20 మంది క్రైస్తవులను చంపినట్లు వెల్లడించింది. కాగా, 14 మందే చనిపోయారని కాంగో అధికారులు చెబుతున్నారు.
