ఆస్ట్రాజెనెకా టీకాపై వ్యక్తమవుతున్న అనుమానాలు.. పంపిణీపై ఎలాంటి ప్రభావం చూపలేదని ప్రపంచ ఆరోగ్య సంస్థ వెల్లడించింది. ఐరోపాలోని పలు దేశాలు ఆస్ట్రాజెనెకా వ్యాక్సిన్పై తాత్కాలిక నిషేధం విధించిన నేపథ్యంలో డబ్ల్యూహెచ్ఓ సోమవారం ఈ వ్యాఖ్యలు చేసింది. ఆస్ట్రాజెనెకా టీకా దుష్ప్రభావం చూపిస్తోందని, వ్యాక్సిన్ తీసుకున్న వారిలో కొందరికి రక్తం గడ్డకడుతోందని ఐరోపా దేశాలు ఆరోపిస్తున్నాయి. అయితే ఆ సమస్య ఐరోపా ఉత్పత్తి కేంద్రాల లోపం కారణంగా ఏర్పడిందని డబ్ల్యూహెచ్ఓ చెబుతోంది.
"మేము ఈ పరిస్థితిని అర్థం చేసుకోగలము. కానీ ఐరోపా ఉత్పత్తి కేంద్రాల్లో తయారైన టీకాలు మాత్రమే దుష్ఫలితాలు ఇస్తున్నాయి. కొవాక్స్ కార్యక్రమం కింద మేము పంపిణీ చేస్తున్న ఆస్ట్రాజెనెకా వ్యాక్సిన్ల వల్ల ఎలాంటి సమస్య తలెత్తలేదు. భారత్, దక్షిణ కొరియాలో తయారు చేసిన ఈ టీకాలను మేము వివిధ దేశాలకు అందిస్తున్నాము. పలు దేశాలు వ్యక్తం చేస్తున్న అనుమానాలు టీకా పంపిణీపై ఎలాంటి ప్రభావం చూపలేదు."
-మేరీ ఏంజెలా సిమో, ప్రపంచ ఆరోగ్య సంస్థ అదనపు డైరెక్టర్
ఆస్ట్రాజెనెకా దుష్ప్రభావం చూపిస్తోందంటూ గత వారం డెన్మార్క్.. టీకాపై తాత్కాలిక నిషేధం విధించింది. అదే బాటను జర్మనీ, ఫ్రాన్స్, ఇటలీ, స్పెయిన్ దేశాలు అనుసరించాయి. ఐరోపా ఇతర దేశాల్లో థాయ్లాండ్, కాంగో దేశాలు ఆ జాబితాలో చేరాయి.
థాయ్ ప్రధానికి టీకా..
థాయ్లాండ్ ప్రధాని ప్రయుత్ ఛాన్ ఓచా మంగళవారం ఆస్ట్రాజెనెకా టీకా తొలి డోసు తీసుకున్నారు. ప్రధాని ప్రయుత్ సహా పలువురు కేబినెట్ సభ్యులు కూడా వ్యాక్సిన్ అందుకున్నారు. కొద్ది రోజుల క్రితం ఆస్ట్రాజెనెకా టీకాపై తాత్కాలిక నిషేధం విధించిన థాయ్లాండ్.. ఇటీవల నిషేధాన్ని తొలగించింది. 'మనం వైద్యులను, వైద్యరంగ నిపుణులను విశ్వసించాలి' అని ప్రధాని ప్రయుత్ పేర్కొన్నారు.
ఇదీ చదవండి : మయన్మార్ హింసాకాండపై గుటెరస్ గరం!
