9 మరణాలు... 2,422 కేసులు... 1.06 కోట్ల మంది జనాభా ఉన్న చెక్ రిపబ్లిక్లో శుక్రవారం నాటికి కరోనా మహమ్మారి తీవ్రత ఇది. ఇతర ఐరోపా దేశాలతో పోల్చితే ఈ సంఖ్య చాలాచాలా తక్కువ. దేశ ప్రజలంతా తప్పనిసరిగా మాస్క్ ధరించాలన్న నిబంధన అమలు చేయడమే ఇందుకు కారణమంటున్నారు పరిశోధకులు.
10 రోజుల్లోనే...
ఐరోపా దేశాల్లో కొవిడ్-19 వ్యాప్తి ఎక్కువగా ఉండడం వల్ల చెక్ రిపబ్లిక్ ప్రభుత్వం కాస్త కఠిన ఆంక్షలు విధించింది. ఇంటి నుంచి బయటకు వచ్చేవారు తప్పనిసరిగా మాస్క్లు, స్కార్ఫ్లు ధరించాలని ఆదేశించింది. ఈ నిబంధనను మార్చి 18 నుంచి అమలు చేసింది.
"కరోనా కేసులు చెక్ రిపబ్లిక్ దేశంలో అదుపులో ఉండటానికి ముఖ్య కారణం ఇంట్లో తయారు చేసిన మాస్కులు వాడటమే. ప్రభుత్వ ఆదేశాల మేరకు ప్రతి ఒక్కరూ విధిగా మాస్కులు ధరించారు. కేవలం పది రోజుల్లోనే ఈ మాస్కులను వంద శాతం మంది వాడారు. పాత టీ షర్టులు, ఇతర వస్త్రాలతో మాస్కులను తయారు చేసుకున్నారు. "
-జెరెమీ హూవార్డ్, డేటా సైంటిస్ట్
లాక్డౌన్ లేనప్పటికీ...
కొవిడ్ 19 ను అడ్డుకునేందుకు దక్షిణ కొరియా, జపాన్, తైవాన్ దేశాల్లో ఇప్పటి వరకు ఎటువంటి లాక్డౌన్లు విధించలేదు. కానీ ఈ దేశాల్లో కరోనా వైరస్ అదుపులో ఉంది. ఇందుకు ప్రధాన కారణం ఆయా దేశాల్లో విరివిగా మాస్కులు ధరించడమేని అంటున్నారు పరిశోధకులు.
ఇదీ చదవండి: గర్భిణికి కరోనా సోకితే.. పుట్టే బిడ్డ పరిస్థితి ఏంటి?
