భారత్లోని సీరమ్ సంస్థ నుంచి 9 కోట్ల కరోనా టీకా డోసుల సరఫరాలో జాప్యం జరిగిందని ఐక్యరాజ్య సమితి ఆధ్వర్యంలోని 'గవీ-కొవాక్స్' గురువారం ప్రకటించింది. దీంతో ప్రపంచవ్యాప్తంగా టీకా అందించే కార్యక్రమంపై తీవ్ర ప్రభావం పడనుందని ఆందోళన వ్యక్తం చేసింది.
భారత్లో వైరస్ కేసులు పెరగడమే అందుకు కారణంగా పేర్కొంది కొవాక్స్. కేసుల పెరుగుదలతో దేశీయ డిమాండ్ పెరగటం వల్ల ఎగుమతులపై ప్రభావం చూపినట్లు తెలిపింది. ఈ నేపథ్యంలో.. మార్చి నెలలో 4కోట్లు, ఏప్రిల్లో 5కోట్ల డోసుల సరఫరాకు అంతరాయం ఏర్పడినట్లు వెల్లడించింది.
గవీ-కొవాక్స్ అనేది ప్రభుత్వ ప్రైవేటు భాగస్వామ్యం కింద పేద దేశాలకు టీకా పంపిణీ కోసం ఏర్పడిన సమాఖ్య. ఈ కొవాక్స్ కార్యక్రమంలో భాగంగా గవీ.. ఈ ఏడాది మార్చి నాటికి 8 కోట్ల డోసులను పంపిణీ చేయాలని నిశ్చయించింది. డోసుల సరఫరా జాప్యం దానిపై ప్రభావం చూపనుంది.
భారత్పై ప్రశంసలు..
ఆఫ్రికా దేశాలకు కొవిడ్19 వ్యాక్సిన్ అందించడంపై భారత్ను కొనియాడారు అమెరికా కాంగ్రెస్ఉమెన్ కారెన్ బాస్. తద్వారా మానవత్వంలో విశ్వాసాన్ని భారత్ పెంపొందించిందన్నారు. ఇప్పటివరకు 70కి పైగా దేశాలకు 6కోట్ల పైచిలుకు టీకాలను భారత్ సరఫరా చేసింది.
వాణిజ్య దెబ్బ..
ఆఫ్రికన్ స్వైన్ ఫీవర్(ఏఎస్ఎఫ్) ప్రభావిత దేశాల జాబితాలో భారత్ను చేర్చినట్లు అమెరికా గురువారం వెల్లడించింది. దీంతో భారత్ నుంచి పంది మాంసం, ఉత్పత్తుల దిగుమతులను నిషేధిస్తున్నట్లు ప్రకటించింది. ఈ నిర్ణయం గతేడాది మేలోనే తీసుకున్నట్లు తెలిపిన యూఎస్.. ఏఎస్ఎఫ్ తమ దేశంలోకి చొరబడకుండా ఈ మేరకు చర్యలు తీసుకున్నట్లు వివరించింది.
ఇదీ చూడండి: '100రోజుల్లో 20కోట్ల డోసుల టీకాయే లక్ష్యం'
