కరోనా కేసులు తగ్గుతున్న వేళ పలు దేశాలు లాక్డౌన్ ఆంక్షలను సడలించేందుకు సిద్ధమవుతున్నాయి. న్యూజిలాండ్లో కఠిన లాక్డౌన్ నిబంధనలను ఈ రోజు అర్ధరాత్రి నుంచి సడలించనుంది అక్కడి ప్రభుత్వం. దేశంలో సామాజిక వ్యాప్తి లేదని ప్రకటించిన న్యూజిలాండ్ ప్రధాని జెంసిండా అడెర్న్.. భౌతిక దూరం నిబంధన అమలు చేస్తూనే మినహాయింపులు ఇచ్చారు.
వైరస్ వల్ల తీవ్రంగా ప్రభావితమైన ఐరోపా దేశాలు ఆర్థిక కార్యకలాపాలను ప్రారంభించేందుకు విధానాలను రూపొందిస్తున్నాయి. స్పెయిన్లో 14 ఏళ్లలోపు పిల్లలను ఆడుకునేందుకు బయటకు వెళ్లేందుకు అనుమతి ఇచ్చారు. మరిన్ని మినహాయింపులను స్పానిష్ ప్రధాని పెడ్రో సాంచెజ్ మంగళవారం ప్రకటించనున్నారు.
విధుల్లోకి జాన్సన్..
కరోనా నుంచి కోలుకున్న అనంతరం.. బ్రిటన్ ప్రధాని బోరిస్ జాన్సన్ ఇవాళ్టి నుంచి విధులకు హాజరవుతున్నారు. కొద్దిరోజులుగా ప్రభుత్వ కార్యకలాపాలను బయటి నుంచే నడిపించిన ఆయన తిరిగి పూర్తిస్థాయి బాధ్యతలు చేపట్టారు.
ఇటలీలో..
ఇటలీలో మరణాల సంఖ్య గణనీయంగా తగ్గింది. గత 24 గంటల్లో 260 మంది మరణించారు. ఈ నేపథ్యంలో కర్మాగారాలు, భవన నిర్మాణ పనలు, హోల్సేల్ సరఫరా వ్యాపారాలపై ఆంక్షల సడలింపులకు ప్రధాని గిసెప్పీ కాంట్ పచ్చజెండా ఊపారు. అయితే ప్రభుత్వం సూచించిన భద్రత చర్యలు తీసుకున్న తర్వాతనే కార్యకలాపాలు ప్రారంభించాలని స్పష్టం చేశారు.
మే 4 తర్వాత పార్కులు, తోటలతో పాటు క్రీడాకారులు శిక్షణను కొనసాగించవచ్చని తెలిపారు కాంట్. సమీపంలో ఉన్న బంధువుల ఇళ్లకు వెళ్లవచ్చన్నారు. అన్ని సక్రమంగా జరిగితే మే 18 నాటికి మాల్స్, మ్యూజియాలు.. జూన్ 1 వరకు రెస్టారెంట్లు, క్షౌర శాలలు తెరిచేందుకు అనుమతి ఇస్తామన్నారు.
అయితే మాస్కుల వాడకం, భౌతిక దూరం పాటించటం తప్పనిసరని స్పష్టం చేశారు ఇటలీ ప్రధాని.
ఇతర ఐరోపా దేశాల్లో..
జర్మనీ అత్యవసరం కాని దుకాణాలు, ఇతర సదుపాయాలను గతవారమే పునఃప్రారంభించింది. డెన్మార్క్లో ఐదో తరగతి వరకు పాఠశాలలను తెరిచేందుకు అనుమతిచ్చింది.
అగ్రరాజ్యంలో తీవ్రతను బట్టి..
అమెరికాలో వ్యాపారాలను ప్రారంభించేందుకు చర్యలు తీసుకోవాలని రాష్ట్రాల గవర్నర్లపై ఆ దేశ అధ్యక్షుడు డొనాల్డ్ ట్రంప్ పదే పదే ఒత్తిడి తెస్తున్నారు. ఈ పరిస్థితుల్లో కొన్ని రాష్ట్రాలు వేగంగా ఆంక్షలను ఎత్తివేస్తున్నాయి. జార్జియా, ఓక్లాహామా, అలస్కాలలో పలు వ్యాపారాలను ప్రారంభించేందుకు అనుమతులు ఇచ్చారు. మాంటానాలోని చర్చిల్లో కొన్ని ప్రార్థనలు ప్రారంభమయ్యాయి.
వైరస్ తీవ్రంగా ఉన్న రాష్ట్రాలు న్యూయార్క్, మిచిగాన్లలో షట్డౌన్ కొనసాగించాలని నిర్ణయించారు అక్కడి గవర్నర్లు. మే రెండో వారం వరకూ ఇళ్లలోనే ఉండాలని ఆదేశాలిచ్చారు.
అమెరికాలో కరోనా కేసుల సంఖ్య 10 లక్షలకు చేరువైంది. ఇప్పటివరకు ఆ దేశంలో 55 వేల మందికిపైగా మరణించారు. 1.18 లక్షల మంది కోలుకున్నారు.
చైనాలో..
వైరస్ పుట్టినిల్లు వుహాన్ ఆసుపత్రుల్లో కరోనా బాధితుల సంఖ్య సున్నాకు చేరింది. ఈ నేపథ్యంలో భవన నిర్మాణ పనులను కొనసాగిస్తున్నారు. పరిశ్రమలతోపాటు ఇతర ఆర్థిక కార్యకలాపాలు ప్రారంభమయ్యాయి.
దక్షిణ కొరియాలో కేసుల సంఖ్య తగ్గిన నేపథ్యంలో పాఠశాలలను తిరిగి ప్రారంభించాలన్న యోచనలో ఉంది ఆ దేశ ప్రభుత్వం.
ఇదీ చూడండి: ప్రపంచవ్యాప్తంగా తగ్గిన కరోనా మరణాలు
